SpaceX Raptor motori sinovda portladi 💥

Ilon Mask asos solgan xususiy koinot kompaniyasi SpaceX insoniyatni Oy va Marsga yetkazishni maqsad qilgan ulkan Starship kosmik kemasini sinovdan o'tkazishda davom etmoqda. Avvalgi uchishlarda muayyan qiyinchiliklarga duch kelingan bo'lsa-da, navbatdagi to'rtinchi sinovga tayyorgarlik jarayonida kutilmagan favqulodda holat yuz berdi.

Xususan, kemani harakatga keltiruvchi Raptor motorlaridan biri alohida sinovdan o'tkazilayotgan vaqtda kutilmaganda portlab ketdi. Joriy yilning 23-may sanasida jonli efirda namoyish etilgan ushlab turish sinogida motor birdaniga olov ichida qolib, sinov maydonchasi bilan birga kulga aylandi. Mazkur hodisa millionlab tomoshabinlar e'tiboridan chetda qolmadi.

Mutaxassislar va tahlilchilarning ta'kidlashicha, favqulodda holatga motor korpusidan yonuvchi gazlarning sizib chiqishi sabab bo'lgan. Suyuq metan va suyuq kislorod yordamida ishlovchi ushbu ulkan motor Starship kemasini Yer atmosferasidan olib chiqish uchun o'ta quvvatli qilib yaratilgan edi. Biroq uning bunday katta hajmi va to'la yoqilg'i zaxirasi xavfsizlik masalasini yanada dolzarblashtiradi.

Yuzaga kelgan ushbu jiddiy nosozlikdan so'ng SpaceX rahbariyati hozircha hodisa sabablari bo'yicha hech qanday rasmiy bayonot e'lon qilgani yo'q. Shunga qaramay, rejalashtirilgan ishlar to'xtatilgani yo'q va 5-iyun kuni navbatdagi parvozni amalga oshirish ko'zda tutilgan. Ushbu sinov davomida kema Meksika ko'rfazidagi kichik platformaga yumshoq tarzda qo'ndirilishi rejalashtirilgan. Agar bu urinish muvaffaqiyatli yakunlansa, insoniyat tarixida ilk bor shunchalik ulkan kosmik kema fazoga uchib borib, ortga sog'-salomat qaytarilgan bo'ladi.