Google’dan yangi avlod sun’iy intellekt chipi 🚀

Google kompaniyasi sun’iy intellekt texnologiyalari uchun mo'ljallangan beshinchi avlod tezlatkich chiplari — Cloud TPU v5e rasman taqdim etilganini e'lon qildi. Tensor Processing Units (TPU) nomi bilan tanilgan ushbu yangi avlod qurilmalari asosiy e'tiborni samaradorlikni oshirishga qaratgan. Kompaniyaning ma'lumotlariga ko'ra, yangi chiplar har bir sarflangan dollar evaziga sun’iy intellekt tarmoqlarini o'qitish unumdorligini ikki barobar oshirishga imkon beradi. Shuningdek, sun’iy intellekt modellarini inferensiya, ya'ni amalda qo'llash jarayonida ham har bir dollar uchun samaradorlik 2,5 barobar ko'paygan.

Google taqdim etgan ma'lumotlarga ko'ra, mazkur yangi TPU chiplari bulutli TPU bozordagi eng arzon va samarali variant hisoblanadi. Bundan tashqari, muhandislar kengaytirish imkoniyatlarini ham sezilarli darajada yaxshilagan bo'lib, bu avvalgi versiyalarga qaraganda bir vaqtning o'zida ko'proq TPU'lardan foydalanish imkonini beradi. Endilikda nafaqat bir nechta TPU'dan iborat yagona modulni, balki o'zaro biriktirilgan bir nechta klasterlarni ham birlashtirish mumkin.

Xususan, 400 Tb/s dan ortiq o'tkazish qobiliyati hamda 100 metaOPS INT8 quvvatiga ega bo'lgan 250 tagacha TPU v5e chiplarini "Pod" deb nomlanuvchi maxsus guruhlarga jamlash imkoniyati mavjud. Yangi Google Cloud TPU v5e chiplari Google Kubernetes Engine, Vertex AI, JAX, TensorFlow hamda Pytorch kabi mashhur platformalar bilan to'liq mos keladi.

Kompaniya mazkur TPU chiplarini o'zining sun'iy intellekt uchun mo'ljallangan bulutli serverlar katalogiga kiritish bilan birga, boshqa yangiliklarni ham taqdim etmoqda. Xususan, Google sun'iy intellekt bo'yicha yuqori yuklamalarga ega superkompyuterlar uchun mo'ljallangan, quvvatli NVIDIA H100 Hopper chiplari bilan jihozlangan yangi A3 G3 server instanslarini ham bozorga chiqarishni rejalashtirmoqda.