Elden Ring va Steam Deck muammosi 🎮

Mashhur Elden Ring o'yini uchun 20-iyun kuni chiqarilgan yirik yangilanish Steam Deck portativ konsolida jiddiy nosozlikni keltirib chiqardi. Mazkur patch o'yinni yaqinda chiqadigan Shadow of the Erdtree qo'shimchasiga tayyorlash maqsadida ishlab chiqilgan bo'lib, unga yangi soch turmaklari qo'shildi, inventar qismi yaxshilandi va boshqa o'zgarishlar kiritildi.

Biroq yangilanish o'rnatilgach, o'yinda Steam Deck bilan moslikni buzuvchi xatolik borligi aniqlandi. Agar foydalanuvchi o'yinni boshlab, konsolni besh daqiqa yoki undan ko'proq vaqt davomida o'z holiga tashlab qo'ysa, Elden Ring boshqaruv buyruqlariga javob bermay qo'yadi. Hozirgi vaqtda From Software dasturchilarida bu muammoning tayyor yechimi mavjud emas.

Dasturchilar xatolikni to'liq bartaraf etishga va'da berishib, allaqachon tegishli ish olib borishmoqda. Shunga qaramay, tuzatish qachon tayyor bo'lishi va foydalanuvchilarga taqdim etilish muddati hozircha noma'lumligicha qolmoqda. Mutaxassislar muammo hal etilguniga qadar konsolni ochiq holda qarovsiz qoldirmaslikni tavsiya qilishmoqda.

Elden Ring uchun kutilayotgan Shadow of the Erdtree qo'shimchasi 21-iyunga o'tar kechasi PC uchun chiqarilishi rejalashtirilgan. Katta ehtimol bilan, ushbu muddatgacha dasturchilar xatolikni tuzatishga ulgurishmaydi va mazkur nosozlik qo'shimcha chiqqanidan keyin ham bir muddat saqlanib qolishi mumkin.