🎮 Sobiq PlayStation rahbari Sony diskdan voz kechishini tanqid qildi

Sony kompaniyasining 2028-yildan boshlab o‘yin disklarini ishlab chiqarishni to‘xtatish haqidagi rejalari o‘yin ixlosmandlari o‘rtasida keskin noroziliklarga sabab bo‘ldi. Ushbu mavzu yuzasidan PlayStation kompaniyasining sobiq rahbari Shon Leyden ham o‘z fikrlarini bildirib o‘tdi. U yaqinda "The Expansion Pass" podkastiga bergan intervyusida ushbu qarorni tanqid ostiga oldi. Garchi u mazkur qaror qabul qilinayotgan paytda kompaniyada ishlamagan bo‘lsa-da, masalaning mohiyatiga to‘xtalib o‘tdi.

Leydenning so‘zlariga ko‘ra, raqamli yuklab olish juda qulaydek tuyulishi mumkin, hatto o‘yinchilar uchun xonaning narigi burchagiga borib diskni konsolga solishdan ko‘ra ham osonroqdek ko‘rinadi. Biroq, u diskdan butunlay voz kechish noto‘g‘ri qaror ekanligiga ishonadi. Uning fikricha, garchi foydalanuvchilarning asosiy qismi raqamli versiyalarni tanlasa-da, disk tarafdori bo‘lgan 20 foizlik auditoriya o‘ta muhim va eng sodiq muxlislardan iborat. Aynan shu qatlamdagi insonlar ko‘pincha bitta o‘yinning ikkita nusxasini sotib olib, birini qutisidan ham chiqarmasdan saqlashadi.

Biroq, asosiy muammo shunchaki kolleksiya yig‘ishda emas, balki mulkdorlik huquqida yotibdi. Kompyuter o‘yinlari bozorida Steam platformasi tufayli foydalanuvchilar raqamli o‘yinlarga allaqachon ko‘nikib qolgan, baʼzida esa GOG kabi xizmatlar o‘yinlarni o‘z disklarida arxivlash imkonini beradi. Afsuski, PlayStation foydalanuvchilari bunday imkoniyatdan mahrum bo‘lishi mumkin.

Shon Leydenning taʼkidlashicha, agar foydalanuvchi o‘yinni sotish huquqiga ega bo‘lmasa, demak u hech narsaga egalik qilmayapti. Bunday holatda xaridor o‘yinga emas, shunchaki unga kirish huquqiga pul to‘layotgan bo‘ladi, bu esa unchalik jozibali eshitilmaydi. Sony kinofilmlarga bo‘lgan kirish huquqlarini cheklagani kabi, ertaga o‘yinlar bilan ham shunday bo‘lishidan xavotirlangan o‘yinchilar eng yomon ssenariylarni o‘ylashmoqda va bu holat kompaniya obro‘siga jiddiy zarar yetkazmoqda.

Sony kompaniyasi kelgusida disklar ishlab chiqarishni to‘xtatish orqali qancha mablag‘ tejamasin, bu harakat keltirib chiqargan norozilik va brend obro‘siga yetgan zararni qoplay oladimi yoki yo‘q – buni vaqt ko‘rsatadi. Ayni paytda esa kompaniya sunʼiy intellekt yordamida patentlar ro‘yxatdan o‘tkazishda davom etmoqda.