Binance Braziliyada 22 ta tokenni taqiqlaydi 🇧🇷

Dunyodagi yetakchi kriptovalyuta birjasi Binance Braziliya bozorida o‘z faoliyatini mahalliy qonunchilik talablariga moslashtirish maqsadida qator jiddiy cheklovlar kiritilishini e’lon qildi. Ushbu o‘zgarishlar natijasida mamlakatdagi foydalanuvchilar uchun jami 22 ta raqamli aktiv savdosi taqiqlanib, sakkizta asosiy xizmat turi cheklanadi.

Xususan, cheklovlar qatoriga Binance Loans kriptokreditlash tizimi, Binance Pool mayning hovuzi, Cloud Mining bulutli mayning xizmati hamda marja savdosi kirdi. Shuningdek, foydalanuvchilarga yangi tokenlarni taqdim etuvchi Launchpool, Megadrop, HODLer Airdrops va Alpha 2.0 dasturlari faoliyati ham cheklanadi.

Birja ma’lumotlariga ko‘ra, joriy kripto-qarzga ega bo‘lgan mijozlar o‘z majburiyatlarini qo‘shimcha jarimalarsiz yopish imkoniyatiga ega bo‘ladilar. Hozirda ochiq turgan marja pozitsiyalarini saqlab qolishga ruxsat etiladi, biroq hisoblarni to‘ldirish, yangi orderlar ochish va qo‘shimcha mablag‘ qarzga olish to‘xtatiladi. Qolgan pozitsiyalarni yopish muddati haqida birja vakillari hozircha aniqlik kiritmagan.

Oktyabr oyining oxirida, aniqrog‘i 27-kundan e’tiboran braziliyalik mijozlar uchun XVG, USDE, USTC, DCR, DUSK, PIVX, BB, MANTRA, ONE, GMT, TFUEL, ZIL, ONT, RVN, ACX, HIT, PYR, VANRY, VIC, ICX, SCRT va STORJ kabi tokenlar savdosi to‘xtatiladi. Mazkur tangalarni foydalanuvchilar o‘z balanslarida saqlab qolishlari, boshqa hamyonlarga yechib olishlari yoki birjaning boshqa investitsiya mahsulotlariga yo‘naltirishlari mumkin bo‘ladi.

Bunday cheklovlarning joriy etilishiga Braziliyadagi mijozlarga xizmat ko‘rsatishni mahalliy yuridik shaxslar orqali amalga oshirishga o‘tish sabab qilib ko‘rsatildi. Shu oyning 29-sanasigacha mijozlarga Binance Brasil Corretora de Câmbio e Valores Mobiliários kompaniyasida individual to‘lov schyotlari ochilishi rejalashtirilgan. Ushbu tuzilma milliy valyutada amalga oshiriladigan operatsiyalarga mas’ul bo‘lsa, kriptovalyuta xizmatlari BBrasil Sociedade Prestadora de Serviços de Ativos Virtuais zimmasiga o‘tadi.

Shuningdek, 1-noyabrdan boshlab xalqaro kriptovalyuta o‘tkazmalarini amalga oshirish talablari ham o‘zgaradi. Endilikda mahalliy mijozlar o‘tkazmaning maqsadi, shuningdek jo‘natuvchi yoki qabul qiluvchi haqidagi ma’lumotlarni ko‘rsatishi shart. To‘plangan ushbu axborotni Binance har oy Braziliya Markaziy bankiga taqdim etib borishga majbur etib belgilandi.