Zcash postkvant imzoflarga o'tmoqda 🛡️

Zcash mijozining dasturiy ta'minotini yaratuvchi Zakura jamoasi kelgusida yuzaga kelishi mumkin bo'lgan kvant tahdidlariga qarshi kurashish choralarini ko'rmoqda. Rejaga ko'ra, 2027-yilning yanvar oyida protokollarga tranzaksiyalar uchun postkvant imzolari opkodlari qo'shiladi. Bu chora birinchi navbatda shaffof manzillarning xavfsizligini ta'minlash zarurati bilan bog'liq, chunki ular mablag' sarflangan vaqtda ommaviy kalit xeshini oshkor qiladi.

Yangilangan dasturiy ta'minot tarmoq xeshlar yordamida tekshirishi mumkin bo'lgan maxsus imzolarni yaratish imkonini beradi. Ushbu yondashuv mablag'larni sarflash ruxsatini tasdiqlash uchun boshqa usuldan foydalanadi. Xavfsizlikni yanada oshirish maqsadida dasturchilar mablag' sarflangandan so'ng qoldiqni yangi manzilga o'tkazishni, ya'ni manzil rotatsiyasidan foydalanishni taklif etishmoqda.

Shuningdek, infratuzilmaga yuboriladigan so'rovlar maxfiyligini ta'minlash ham muhim masala hisoblanadi. Agar hamyon ochiq turdagi bir nechta shaffof manzillar tarixini talab qilsa, server foydalanuvchini aniqlab olishi mumkin. Buni oldini olish uchun Zakura Private Information Retrieval mexanizmini rivojlantirmoqda, bu esa qaysi manzillar tekshirilayotganini oshkor qilmasdan kerakli ma'lumotlarni olish imkonini beradi. Ayni paytda ushbu funksiyaning sinov versiyasi Vizor hamyonida mavjud.

Ma'lumotlarga ko'ra, muomaladagi ZEC tangalarining katta qismi, aniqrog'i 70 foizga yaqini shaffof hovuzda saqlanmoqda. Shu sababli, postkvant rejalari birinchi navbatda tarmoqning ommaviy qismiga ta'sir ko'rsatadi, himoyalangan o'tkazmalar esa kelgusidagi xavflardan alohida himoyaga muhtoj bo'ladi. Ushbu muhokamalar Ethereum tadqiqotchisi Jastin Dreykning sanoatni tayyorlash zarurligi haqidagi bayonotlaridan so'ng yanada kuchaydi. Avvalroq Ethereum Foundation ham tarmoqni kvant kompyuterlaridan himoya qilish yo'l xaritasini taqdim etgan edi.