💻 Sensorli MacBook Pro tez orada chiqishi mumkin!

Apple kompaniyasi yaqin kelajakda o‘z tarixidagi ilk sensorli ekranli MacBook Pro noutbukini taqdim etishi kutilmoqda. Shu paytgacha bu ma'lumot faqatgina nufuzli insayderlarning xabarlariga tayanib kelingan bo‘lsa, endilikda buning uchun dasturiy ta'minot tomonidan ilk aniq ishoralar paydo bo‘ldi. Yangi macOS 27.2 beta 3 versiyasining kodi kompaniyaning sensorli qurilma chiqarish rejasi yaqinlashgani haqida muhim dalilni taqdim etdi.

Gap shundaki, yangi beta versiyada macOS Dock panelidagi ikonka ustida uzoq bosib turganda sodir bo‘ladigan animatsiya qo‘shilgan. Hozirgi vaqtda trekpad orqali amalga oshiriladigan bunday uzoq bosish sichqonchaning o‘ng tugmasi vazifasini bajarib, ilova menyusini ochadi. Biroq yangi versiyada ikonkaning o‘zi biroz kattalashmoqda, bu esa xuddi iOS va iPadOS operatsion tizimlaridagi xatti-harakatlarni eslatadi. Bu hali to‘g'ridan-to‘g'ri yakuniy tasdiq bo‘lmasa-da, sensorli MacBook haqidagi taxminlarni yanada kuchaytirmoqda.

Kecha taniqli Apple kuzatuvchisi Mark Gurman ham uzoq kutilgan sensorli MacBook Pro shu yilning oxirigacha namoyish etilishini ma'lum qilgan edi. Bloomberg muxbirining ta'kidlashicha, yangi noutbuk hozirgi 16 dyuymli M5 MacBook Pro modeliga qaraganda sezilarli darajada yengilroq bo‘ladi.

Shuningdek, Gurmanning fikricha, qurilmada yangi e'lon qilinmagan protsessorlar emas, balki M5 chipi o‘z ishini davom ettiradi. Bundan tashqari, macOS Golden Gate operatsion tizimi sensorli boshqaruvni qo‘llab-quvvatlash uchun yangilanishi hamda kutilayotgan tandem OLED displeyida Dynamic Island funksiyasi bo‘lishi kutilmoqda.