Elektromobillarda kelajak batareyalari ⚡

Kelgusida elektrda ishlaydigan avtomobillar uchun taqdim etiladigan akkumulyator turlari ko'payib, har bir modelning narxi va yurish masofasiga qarab turli variantlar taklif etiladi. Hozirning o'zida bir xil rusumdagi mashinalar ham NMC, ham LFP elementlari bilan sotuvga chiqarilmoqda, kelgusida esa bunday texnologiyalar soni beshtagacha ortishi kutilmoqda.

Xarajatlarni kamaytirish avtomobil ishlab chiqaruvchilar uchun asosiy talab sanaladi. Sodyum iyon batareyalar arzonligi bilan ajralib tursa-da, energiyani zich saqlash borasida boshqalardan ortda qoladi. Shu sababli, bunday turdagi akkumulyatorlar 30-40 kVt/soat sig'imga ega, 300 kilometrgacha bo'lgan masofaga mo'ljallangan shahar ichidagi transport vositalarida qo'llanilishi taxmin qilinmoqda.

O'rta o'lchamli va standart masofaga ega mashinalarda litiy temir fosfat, ya'ni LFP texnologiyasi ustunlik qiladi. Sodyumga qaraganda yuqoriroq energiya zichligiga ega bu batareyalar og'irlikni kamaytirib, narxni ham o'rtacha saqlashga yordam beradi. Hozirda 75-80 kVt/soatlik paketlarda ishlatilayotgan LFP batareyalari taxminan 500 kilometrlik masofani ta'minlay oladi.

Uzoq masofaga mo'ljallangan transportlar uchun esa nikel, marganets va kobaltni o'z ichiga oluvchi NMC batareyalari tanlanmoqda. Tarkibidagi nodir elementlar sababli ular qimmatroq turadi, biroq yuqori energiya zichligi evaziga 75-80 kVt/soatdan yuqori hajmlarda 600-700 kilometrgacha yo'l bosish imkonini beradi.

To'la qattiq holatli batareyalardan oldin hayotimizga yarim qattiq holatli texnologiyalar kirib keladi. Oddiy akkumulyatorlardagi suyuqlik miqdori bu turda besh foizgacha kamaytirilgan bo'lib, ular ham LFP, ham NMC asosida alohida rivojlantirilmoqda. Ular ommalashganidan bir necha yil o'tibgina eng qimmat va yuqori segmentdagi modellar uchun to'la qattiq holatli batareyalar tatbiq etila boshlaydi.