Apple Yevropada Samsung'ni ortda qoldirdi 📱

Counterpoint Research tahliliy kompaniyasi tomonidan e'lon qilingan yangi hisobotga ko'ra, 2026-yilning ikkinchi choragida Apple Yevropaning aloqa operatorlari kanali orqali smartfonlar savdosida Samsung brendini ortda qoldirib, bozor yetakchisiga aylandi. Ushbu davrda Yevropadagi umumiy smartfonlar savdosi 8 foizga qisqargan bo'lsa-da, operatorlar orqali amalga oshirilgan savdolar pasayishi atigi 4 foizni tashkil etdi va ochiq bozordagi 11 foizlik pasayishdan sezilarli darajada yaxshiroq natija ko'rsatdi.

Mazkur o'zgarishlarga asosiy sabab sifatida xotira narxlarining oshishi ko'rsatilmoqda. Ushbu muammo Yevropadagi arzon smartfonlar bozoriga jiddiy ta'sir ko'rsatdi. Biroq operator kanallari odatda qimmatbaho qurilmalar va Apple kabi premium brendlarga yo'naltirilgani hamda shartnoma asosida xaridlar ko'pligi sababli bu tanazzulni yaxshiroq yengib o'tdi. Hisobotga ko'ra, 2025-yilning ikkinchi choragida Yevropa operatorlari bozorida Apple ulushi 33 foizni tashkil etgan bo'lsa, 2026-yilda bu ko'rsatkich 37 foizga ko'tarildi. Xuddi shu davrda Samsung'ning ulushi esa 39 foizdan 34 foizgacha pasaydi.

Shu bilan birga, Xitoyning vivo brendi operatorlar savdosida yillik hisobda eng yuqori – 90 foizlik o'sishni qayd etdi. Motorola esa 27 foizlik o'sish bilan bu borada ikkinchi o'rinni egalladi. Har ikki brend ham Yevropaning asosiy operatorlari bilan hamkorlikda muvaffaqiyatli strategik qadamlarni amalga oshirdi.

Counterpoint Research direktori o'rinbosari Yan Stryjakning ta'kidlashicha, xotira narxlari inqirozi quyi bozor segmentiga jiddiy zarar yetkazishda davom etar ekan, kelgusi choraklarda ham operatorlar kanali o'z ulushini oshirib borishi kutilmoqda. Shu bilan birге, mustaqil chakana sotuvchilar tomonidan o'tkazilayotgan faol aksiyalar ochiq bozorni qo'llab-quvvatlashga yordam berishi mumkin.