pixivFANBOX qoidalarini yangiladi 🤖

Yaponiyaning yirik illyustratsiya platformasi hisoblangan pixivFANBOX o'zining foydalanish qoidalariga muhim o'zgartirishlar kiritdi. Yangilangan tartibga ko'ra, joriy yilning 25-iyulidan boshlab foydalanuvchilarning tashqi havolalar yordamicha sun'iy intellekt yordamida yaratilgan taqiqlangan kontent cheklovlarini chetlab o'tishiga yo'l qo'yilmaydi.

Avvalroq, may oyida FANBOX platformasi Midjourney, Stable Diffusion kabi sun'iy intellekt texnologiyalari yordamida tayyorlangan illyustratsiyalarni yuklash hamda sotishni taqiqlagani haqida xabar berilgan edi. Odatda oylik obuna tizimi asosida ishlaydigan ushbu saytda muxlislar rassomlarga to'lov qilib, raqamli ijod namunalarini qabul qilib olishadi.

Biroq, AI taqiqlari joriy etilgach, ayrim foydalanuvchilar obuna xizmatlarini saqlab qolgan holda, boshqa tashqi saytlarga olib boruvchi havolalar orqali sun'iy intellekt yordamida yaratilgan rasmlarni tarqatishda davom etayotgani ma'lum bo'ldi. Shu sababli ma'muriyat rassomlarga o'z ishlarini ko'rsatish uchun foydalanuvchilarni tashqi xotira xizmatlari yoki boshqa saytlarga yo'naltirishni taqiqlovchi qarorga keldi.

Qoidaga kiritilgan o'zgarishlar ayniqsa generativ sun'iy intellekt mahsulotlarining ko'payib ketishiga qarshi qaratilgan. Hujjatda sun'iy intellekt mahsulotiga aniqlik kiritilib, unga ko'ra to'liq yoki asosiy qismi SIn yordamida ishlangan yoxud faqatgina yengil tahrirlangan kontentlar taqiqlangan toifaga kiradi.

Shu bilan birga, muallifning o'zi chizgan rasmlarini AI orqali avtomatik bo'yash, matnlarni SIn yordamida tarjima qilish yoki tushuntirish yozish taqiqlangan toifaga kirmasligi ta'kidlandi. Ma'muriyat barcha foydalanuvchilarni yangi qoidalar kuchga kiradigan 25-iyulga qadar bunday kontentlarni o'zgartirish yoki olib tashlashga chaqirdi.