O‘zbekiston Markaziy Osiyoning «Polsha»si deb topildi 📊

Avstriyaning yirik moliyaviy tuzilmalaridan biri hisoblangan «Raiffeisen Research» tashkiloti O‘zbekiston iqtisodiyoti rivojiga bag‘ishlangan navbatdagi tahliliy hisobotini jamoatchilik e'tiboriga havola etdi. Mazkur hujjatda mamlakatimizda amalga oshirilayotgan keng miqyosdagi islohotlar dasturi tahlil qilinib, respublika o‘zini Markaziy Osiyo mintaqasining o‘ziga xos «Polsha»si sifatida tanitgani e'tirof etildi.

Tahlilchilarga ko'ra, xuddi 2008-2009 yillardagi jahon moliyaviy inqirozi davrida Polsha duch kelgan vaziyat kabi, O‘zbekiston ham 2020 yildagi koronavirus pandemiyasi sharoitida ijobiy iqtisodiy o‘sish ko'rsatkichlarini ta'minlashga erishdi. Natijada mamlakat muqarrar iqtisodiy tanazzulning oldini olishga muvaffaq bo'ldi va bu ko'rsatkich Sharqiy Yevropa hamda Markaziy Osiyo mintaqasidagi o‘rtacha YaIM o‘sish sur'atidan yuqori ekani qayd etildi.

Mutaxassislar uzoq muddatga mo‘ljallangan oqilona iqtisodiy siyosat, inqirozlarga bardoshlilik va ularni samarali boshqarish ko‘nikmalari respublikaga qo‘shni davlatlarga nisbatan yaxshiroq natijalarni qayd etish imkonini berganini ta'kidlashdi. Shuningdek, fiskal siyosatning barqarorlikka qaratilgani davlat qarzini YaIMning 40 foizidan oshirib yubormagan holda inqirozga qarshi choralarni samarali ko'rishga zamin yaratgan.

Hisobotda Markaziy bank faoliyatiga ham alohida to'xtalib o'tilgan. Unga ko‘ra, regulyator o‘zining konservativ va cheklangan yuqori foiz stavkalari siyosatini mustaqil ravishda yurib kelmoqda. Bu qadam inflyatsion bosim kuchli bo‘lgan sharoitda to‘g‘ri qaror bo'lib, ayni paytda mahalliy kapital bozoriga xorijiy investorlarni jalb qilish hamda valyuta kursining keskin tebranishlarining oldini olishda muhim vosita bo'lib xizmat qilmoqda.