🚗 ЙПХ ходимини машина уриб кетди

Toshkent shahrida sodir boʻlgan YPX xodimi bilan bogʻliq yoʻl-transport hodisasi yuzasidan qoʻshimcha rasmiy maʼlumotlar taqdim etildi. Maʼlum boʻlishicha, ushbu koʻngilsiz holat haydovchining eʼtiborsizligi oqibatida kelib chiqqan.

Joriy yilning 20-aprel kuni soat 10:40 lar atrofida poytaxtning Mirzo Ulugʻbek tumanidagi Abdulla Qodiriy va Mahatma Gandi koʻchalari kesishgan chorrahada xizmat olib borayotgan Toshkent shahar IIBB YHXB YPX inspektori Farhod Sayhamatov avtohalokatga uchradi.

Xususan, fuqaro A.T. boshqaruvidagi Hyundai Sonata rusumli avtomashina harakat vaqtida inspektorning oyogʻini bosib ketgan. Haydovchining soʻzlariga koʻra, mazkur chorrahada oldinroq boshqa bir toʻqnashuv sodir boʻlgan va YPX xodimi shu ishtirokchilarga yordam koʻrsatayotgan boʻlgan. Abdulla Qodiriy yoʻnalishi boʻylab harakatlanib kelayotgan haydovchi oʻzining eʼtiborsizligi tufayli mashinasining orqa chap gʻildiragi bilan xodimning oyogʻini bosib yuborganini tan olgan.

Voqeadan soʻng darhol Hyundai haydovchisi tan jarohati olgan YPX xodimini shifoxonaga olib borgan va unga zarur birinchi yordam koʻrsatilishini taʼminlagan. Hozirgi vaqtda sodir boʻlgan ushbu yoʻl-transport hodisasi yuzasidan masʼul xodimlar tomonidan tegishli hujjatlar rasmiylashtirilib, oʻrnatilgan tartibda ish olib borilmoqda.