Sui tarmog'ining Hashi loyihasi 500 mln $ oldi 🚀

Sui tarmog'ining yangi tashabbusi bo'lgan Hashi loyihasi oktyabr oyi oxirida bosqichma-bosqich asosiy tarmoqqa chiqishidan avval 500 million dollardan ziyod mablag' jalb qildi. Ushbu tashabbus doirasida Anchorage Digital hamkorlar safiga qo'shilib, institutsional mijozlarga xizmat ko'rsatishga tayyorgarlik ko'rmoqda.

Hashi mexanizmi foydalanuvchilarning Bitcoin aktivlarini o'zining asosiy tarmog'ida saqlagan holda, Sui tarmog'ida dasturlashtiriladigan hBTC tokenlarini muomalaga chiqarishga mo'ljallangan. Tizimdan chiqish vaqtida esa hBTC yo'q qilinib, asl Bitcoin egalariga qaytarib beriladi. Ushbu yondashuv orqali uchinchi tomon dasturchilari Bitcoin’ni boshqa tarmoqqa o'tkazmasdan turib, turli moliyaviy mahsulotlarni yaratish imkoniga ega bo'ladilar.

Loyihaning infratuzilmasi Mysten Labs tomonidan ishlab chiqilgan bo'lib, uning xavfsizligi MPC texnologiyasi, smart-kontraktlar va maxsus qo'riqchi qatlam orqali nazorat qilinadi. Dastlab mart oyida e'lon qilingan loyiha devnet va testnet bosqichlaridan o'tib, hozirda asosiy tarmoqqa tayyorlanmoqda. BitGo, Bullish, Cumberland, FalconX va Ledger kabi yigirmadan ortiq yirik global kompaniyalar loyihaning ta'sischi hamkorlari qatoriga kirdi.

Rasmiylarning ta'kidlashicha, 500 million dollarlik ko'rsatkich hozircha faqatgina hamkorlarning moliyaviy majburiyatlarini bildiradi va bu mablag'lar tarmoqqa to'liq kiritilgan yoki blokcheynda faol bo'lgan umumiy qiymat degani emas. Shunga qaramay, mazkur tashabbus Sui ekotizimida institutsional kapital uchun yangi imkoniyatlar eshigini ochmoqda.