Samsung Galaxy F15 5G Geekbench sinovidan o‘tdi 📱

Samsung kompaniyasi o‘tgan yilning dekabr oyida Hindistonda Galaxy A15 5G smartfonini taqdim etgan edi. Oradan ko‘p o‘tmay, endilikda uning yaqin qarindoshi sanalgan Galaxy F15 5G modeli Geekbench platformasidagi ma'lumotlar bazasida paydo bo‘ldi va uning ayrim texnik xususiyatlari oshkor etildi.

Ma'lumotlar bazasidagi protsessor chastotalariga ko‘ra, yangi smartfon A15 5G modeli bilan bir xil bo‘lgan 6 nanometrli MediaTek Dimensity 6100+ chipseti bilan ta'minlanishi kutilmoqda. Ushbu protsessor ikkita 2.2 gigagersli Cortex-A76 va oltita 2.0 gigagersli Cortex-A55 yadrolaridan iborat bo‘lib, Arm Mali-G57 MC2 grafik protsessorini o‘z ichiga oladi. Shuningdek, sinov ro‘yxatida qurilmaning One UI 6.0 grafik qobig‘iga asoslangan Android 14 operatsion tizimida ishlashi hamda 4 GB tezkor xotiraga egaligi ko‘rsatilgan.

A15 5G modeli 8 GB gacha tezkor xotiraga ega ekanini hisobga olsak, F15 5G uchun ham 6 GB va 8 GB li modifikatsiyalar taqdim etilishini taxmin qilish mumkin. Smartfonning qolgan xususiyatlari bo‘yicha u A15 modeliga o‘xshash bo‘lishi kutilmoqda: xususan, 90 gerts yangilanish chastotasiga ega 6.5 dyuymli FHD+ Infinity-U Super AMOLED displey, 50 megapikselli asosiy kameraga ega uch karrali orqa kamera moduli va yon qismida joylashgan barmoq izi skaneri shular jumlasidandir.

Shu hafta boshida tarqalgan Galaxy F15 5G render suratlari qurilmaning qora, binafsha va yalpiz ranglarda, biroz yumaloqlashtirilgan dizaynda chiqishini ko‘rsatdi. A15 5G modelidagi 5000 mA/soatlik akkumulyatordan farqli o‘laroq, yangi smartfonda 6000 mA/soat sig‘imli batareya va 25 Vt quvvat olish xususiyati bo‘lishi aytilmoqda. Hozirda ushbu gadjet BIS sertifikatidan o‘tgani va Samsung Hindistonning qo‘llab-quvvatlash sahifasida paydo bo‘lgani uning rasmiy taqdimoti yaqin ekanidan darak beradi.