Huawei MatePad Pro Max Rossiyada 📱

Rossiyaning yirik savdo tarmoqlari xalqaro miqyosda 2026-yilning may oyida debyut qilgan Huawei MatePad Pro Max planshetini oldindan buyurtma qilish imkoniyatini ochdi. «ixbt.com» nashrining xabar berishicha, ushbu yangi gadjetning boshlang‘ich narxi 100 ming rublni tashkil etadi.

Qurilma xaridorlarga kulrang va moviy rang variantlarida hamda bir nechta turli xil to‘plamlarda taqdim etilmoqda. Masalan, MTS do‘konlarida 12 gigabayt tezkor va 256 gigabayt doimiy xotiraga ega hamda g‘ilof-kitobcha bilan birga keladigan versiya 100 ming rublga baholangan. Agar xaridor g‘ilof o‘rniga klaviatura jamlanmasini tanlasa, uning narxi 115 ming rublga ko‘tariladi. Shuningdek, 12 va 512 gigabayt xotirali hamda klaviaturali ilg‘or model 130 ming rubl evaziga sotuvga chiqarilgan.

Texnik xususiyatlariga ko‘ra, Huawei MatePad Pro Max 3K piksellar o‘lchamiga ega, 144 gerts yanglanish chastotasi va nurni qaytarmaydigan maxsus qatlam bilan qoplangan 13,2 dyuymli OLED PaperMatte ekraniga ega. Metall korpusli planshetning qalinligi atigi 4,7 millimetrni, og‘irligi esa 499 grammni tashkil qiladi. Uning ichiga o‘rnatilgan 10 400 mA·soat sig‘imli akkumulyator qurilmaning quvvat olmasdan 14,5 soatgacha ishlashini ta'minlaydi.

Gadjet foydalanuvchilarga WPS Office dasturining to‘liq versiyasidan foydalanish, shuningdek, maxsus stilus va klaviatura yordamida ishlash imkonini beradi. Bundan tashqari, 50 megapikselli asosiy kamera GoPaint ilovasi bilan birgalikda raqamli kontent yaratish va rasm chizish uchun qulay vositalarni taqdim etadi.