Tonirovka narxlari arzonlashishi mumkin ☀️

Havo harorati ko‘tarilib, yoz fasli boshlanishi bilan avtomobillar oynalarini qoraytirish masalasi jamoatchilik e’tibor markaziga chiqadi. Joylarda o‘tkaziladigan uchrashuvlarda hamda ijtimoiy tarmoqlarda fuqarolar va yoshlar tomonidan aynan shu mavzuda ko‘plab murojaatlar kelib tushishi odatiy holga aylangan.

Mazkur murojaatlarni inobatga olgan holda, Oliy Majlis Qonunchilik palatasi deputati Doniyor G‘aniyev va uning hamkasbi Bahrom Rahmonaliyev tonirovka xizmati narxlarini pasaytirish bo‘yicha bir nechta takliflarni ishlab chiqishgan. Ushbu tashabbuslarni Vazirlar Mahkamasiga kiritishdan oldin, deputatlar Ichki ishlar vazirligiga rasmiy so‘rov yuborib, ularning munosabatini bildirishlarini so‘ragan edilar.

Ko‘p o‘tmay Ichki ishlar vazirligidan javob xati kelgan bo‘lib, unda deputatlarning aniq takliflariga bevosita munosabat bildirilmagani qayd etilgan. Shunga qaramay, xatda ijobiy mazmundagi muhim ma’lumot ham mavjud bo‘lib, unga ko‘ra hozirda Prezident Administratsiyasi tomonidan tonirovka narxlarini pasaytirishga qaratilgan qaror loyihasi tayyorlangan.

Vazirlik mazkur loyiha yuzasidan o‘z taklif va mulohazalarini taqdim etgan. Deputatning fikricha, avtomobil oynalarini qoraytirish cheklovlari butunlay olib tashlanmasa ham, belgilangan narxlar yaqin orada sezilarli darajada kamayishi kutilmoqda.