Lenovo Yoga 7i 16 noutbuki narxi tushdi 💻

Best Buy chakana savdo tarmoqlari iste'molchilar uchun qiziqarli taklifni taqdim etib, Lenovo Yoga 7i 16 Gen 9 rusumli transformatser noutbuklari narxini sezilarli darajada pasaytirdi. Mazkur chegirma cheklangan muddatga mo‘ljallangan bo‘lib, xaridorlarga ushbu rusumdagi gadjetni eng past narxlarda xarid qilish imkonini beradi.

Qurilmaning Intel Core Ultra 5 125U protsessori, 16 gigabayt LPDDR5X-7467 tezkor xotirasi hamda 512 gigabaytli PCIe 4.0 SSD xotirasiga ega bo‘lgan boshlang‘ich konfiguratsiyasi hozirda 599.99 dollarga sotilmoqda. Bu asl tavsiya etilgan chakana narxdan naq 300 dollarga arzondir. Agar xaridor Intel Core Ultra 7 155U protsessoriga ega va xotira hajmi ikki barobar katta bo‘lgan ikkinchi variantni tanlasa, buning uchun qo‘shimcha 100 dollar to‘lashi kerak bo‘ladi.

Ikkala model ham bir xil texnik xususiyatlarga ega 16 dyuymli IPS sensorli displey bilan jihozlangan. Ekran 1920×1200 piksellar o‘lchamiga, 300 nit maksimal yorug‘lik darajasiga hamda 60 gerts yanglanish chastotasiga ega. Ulanish imkoniyatlari borasida noutbuk ikkita USB-C (Thunderbolt 4, DisplayPort 2.1, Power Delivery 3.1), ikkita 5 Gb/s tezlikdagi USB-A, HDMI 2.1, 3.5 millimetrli audio uyasi va microSD xotira kartasi o‘quvchi moslamasi bilan ta'minlangan. Shuningdek, Wi-Fi 6E va Bluetooth 5.3 simsiz aloqa standartlari ham mavjud.

Alyuminiy korpusga ega mazkur 2-in-1 formatidagi qurilmaning o‘lchamlari 361.8 × 250 × 17 millimetrni tashkil etib, og‘irligi 2.1 kilogrammni tashkil qiladi. Undagi 71 vatt-soat quvvatga ega akkumulyator jamlanmadagi USB-C quvvatlash moslamasi yordamida 65 vattgacha quvvat olishi mumkin. Eslatib o‘tamiz, ushbu noutbukni baholash jarayonida uning batareya quvvati yaxshilangani va sovutish tizimi jim ishlaydigan bo‘lgani maqtovga sazovor topilgan, biroq ekranning rang qamrovi cheklangani uning kamchiliklaridan biri sifatida ko‘rsatib o‘tilgan.