PayPal xizmati O'zbekistonda ishga tushishi mumkin 💳

O'zbekistonda xalqaro miqyosdagi PayPal to'lov tizimiga rasman ruxsat berilishi ehtimoli muhokama qilinmoqda. Hozirgi kunda Markaziy bank ushbu tizim vakillari bilan muzokaralar olib borayotgani ma'lum bo'ldi. Shu bilan birga, mamlakat ichida mazkur xizmatga raqobatdosh bo'lgan o'zimizning milliy pul o'tkazish tizimimizni ham joriy qilish masalasi o'rganilmoqda.

Mazkur ma'lumot axborot texnologiyalari va kommunikatsiyalarini rivojlantirish vaziri Shuxrat Sodikov tomonidan IT-parkda jurnalistlar va bloggerlar bilan o'tkazilgan muloqot chog'ida aytib o'tildi. Uchrashuv davomida O'zbekiston fuqarolari va ayniqsa frilanserlar uchun qulayliklar yaratish maqsadida PayPal tizimini mamlakatimizda ishga tushirish masalasi o'rtaga tashlandi.

Vazirning ta'kidlashicha, mazkur masala faqat bitta vazirlik vakolatiga kiruvchi vazifa emas. U to'g'ridan-to'g'ri Markaziy bank tomonidan hal etilishi lozim bo'lib, idoralararo kelishuv asosida amalga oshiriladi. Shu bilan birga, PayPal kompaniyasining turli davlatlar oldiga qo'yadigan o'ziga xos talablari va Markaziy bank zimmasiga tushadigan mas'uliyat jihatlari ham mavjud.

Eslatib o'tamiz, bundan avvalroq, 2018 yilda ushbu tizim nima sababdan O'zbekistonda ishlay olmasligi tushuntirilgandi. O'sha vaqtda milliy qonunchilik jismoniy shaxslarga mablag'larni xorijiy valyutada saqlashga yo'l qo'ymasligi, elektron hamyonlar esa chet eldagi hisobvaraqlarga tenglashtirilishi sabab bo'lgan. Keyinchalik, 2019 yilning oktyabr oyida qonunchilikka tegishli o'zgartirishlar kiritilib, fuqarolarga xorijda hisob raqam ochishga ruxsat berildi. Shunga qaramasdan, hozirgi kunga kelib ham O'zbekiston Markaziy Osiyoda PayPal tizimiga ulanmagan yagona davlatligicha qolmoqda.