Base tarmog'idan 6 million dollar o'g'irlandi 🚨

Base tarmog'idagi raqamli omborlardan biridan umumiy qiymati 6 million dollarni tashkil etuvchi kriptoaktivlar noma'lum shaxslar tomonidan o'g'irlandi. Xavfsizlik bo'yicha mutaxassislarning ma'lumotlariga ko'ra, tajovuzkor dastlab 1 aBaswstETH miqdoridagi kichik tranzaksiya yordamida tarmoqdagi zaiflikni tekshirib ko'rgan, shundan so'ng beshta yirik operatsiyani amalga oshirgan.

Blockaid tahlilchilari mazkur kiberhujum kirish huquqini taqsimlash tizimida yo'l qo'yilgan xato tufayli yuzaga kelganini tushuntirdilar. Jinoyatchi ombor aktivlarini garovga qo'ygan holda qarz olgan, Aave protokolidagi mablag'larni tasdiqlovchi aToken'larni qo'lga kiritgan. Shundan keyin u o'zining aqlli shartnomasi orqali ularni wstETH'ga almashtirib, shaxsiy hamyoniga ko'chirib olgan.

Mutaxassislarning baholashicha, haker mavjud mablag'larning faqat bir qismini chiqarib olishga ulgurgan. Hujum qilingan shartnoma ichida hozircha turli xil aktivlarda qariyb 31,7 million dollar saqlanib qolmoqda. Hamyon ustidan nazorat to'liq tiklanmaguncha yoki zaif shartnoma tarmoqdan ajratib qo'yilmaguncha, bu mablag'lar ham jiddiy xavf ostida qolishda davom etmoqda.

Shuningdek, xavfsizlik ekspertlari hujumdan biroz oldin kirish sozlamalarida o'zgarishlar sodir bo'lganiga e'tibor qaratdilar. Tajovuzkorning shartnomasi dastlab ruxsat etilgan manzillar ro'yxatidan o'chirilgan, biroq keyinchalik bir nechta imzoni talab qiluvchi hamyon orqali qayta faollashtirilgan. Blockaid mutaxassislari bu holat operatsiyalarni tasdiqlovchi ishtirokchilarning maxfiy kalitlari buzib kirilganidan (komprometatsiya) dalolat berishi mumkinligini taxmin qilmoqdalar.

Voqeadan so'ng hali birorta markazlashtirilmagan moliya (DeFi) protokoli jabrlangan aqlli shartnoma aynan unga tegishli ekanini ochiqchasiga e'lon qilgani yo'q. Eslatib o'tamiz, bungacha blokcheyn xavfsizligi bilan shug'ullanuvchi PeckShield kompaniyasi Duelbits kriptokazinosi manzillaridan 4,3 million dollar atrofida mablag' o'g'irlangani haqida xabar tarqatgan edi. Ushbu mablag'lar Ethereum va BNB Chain tarmoqlari orqali ko'chirilgani aniqlangan.