⌚️ Honor Watch 5 Ultra: Yangi aqlli soat taqdim etildi

Honor kompaniyasi texnologiya ixlosmandlari e'tiboriga o'zining yangi flagman aqlli soati — Watch 5 Ultra'ni havola etdi. Mazkur qurilma nafaqat jozibali tashqi ko'rinishi, balki o'ta chidamliligi bilan ham ajralib turadi. Titanyum qotishmasidan yasalgan korpus zarbalarga, korroziyaga va tirnalishlarga qarshi yuqori darajada himoyalangan bo'lib, SGS tashkilotining besh yulduzli sertifikatiga sazovor bo'lgan.

Model 466x466 pikselli aniqlikka ega 1.5 dyuymli AMOLED displey bilan jihozlangan. Safir shisha bilan himoyalangan ekran yorqin quyosh nurlari ostida ham aniq tasvirni ta'minlay oladi. Sakkiz qirrali ramka dizaynga o'ziga xos ko'rk bag'ishlaydi. Qurilma Honor'ning shaxsiy MagicOS operatsion tizimida ishlaydi va DeepSeek sun'iy intellekt modelini qo'llab-quvvatlaydi. Shuningdek, YOYO yordamchisi foydalanuvchiga aqlli eslatmalar va muhim salomatlik ma'lumotlarini taqdim etadi.

Salomatlik va sport imkoniyatlari borasida ham soat ko'plab ilg'or funksiyalarni o'z ichiga olgan. Ular qatoriga EKG ko'magi, yurak to'xtashi xavfini skanerlash hamda avtonom nerv tizimini kuzatish kiradi. Sport ixlosmandlari uchun 105 xil faollik rejimi, shu jumladan bandji-jumping va geybol kabi noodatiy turlar mavjud. Suv ostida suzishni yoqtiruvchilar uchun 40 metrgacha bo'lgan chuqurlikda erkin sho'ng'ish imkoniyati bor. Qolaversa, 5ATM va IP68 standartlari suvdan to'laqonli himoyani kafolatlaydi.

Batareya quvvati foydalanish sharoitiga ko'ra turlicha davom etadi. eSIM funksiyasi o'chirilgan holatda qurilma 15 kungacha, Honor smartfonlari bilan ulanganda esa 10 kungacha ishlay oladi. To'liq eSIM rejimida esa bu ko'rsatkich 3 kunni tashkil qiladi. Shuningdek, soatda simsiz quvvat olish imkoniyati ham mavjud.

Narxlar mijoz tanlagan material turiga qarab belgilanadi. Qora rangli versiya 275 dollar, jigarrang charm tasmali talqin 317 dollar, titanyum dizayndagi variant esa 399 dollardan sotuvga chiqarildi. Yangi aqlli soat kompaniyaning rasmiy kanallari orqali xaridorlarga taklif etilmoqda.