Solingen fojiasida qo‘lga olingan shaxs 🚨

Germaniyaning Solingen shahrida ikki nafari go‘dak bo‘lgan to‘rt nafar turk millatiga mansub Bolgariya fuqarosining hayotiga zomin bo‘lgan fojiali yongin yuzasidan gumonlanuvchi shaxs qo‘lga olindi. Rasmiylar Germaniya fuqarosi bo‘lgan Daniel S. ismli shaxs binoga qasddan o‘t qo‘yganlikda gumon qilinib hibsga olinganini ma'lum qilishdi.

Vuppertal prokurori Heribert Kaune-Gebhardtning bildirishicha, 39 yoshli gumonlanuvchi 8-aprel kuni boshqa bir janjalli voqeada boshqa bir shaxsni jarohatlagani ortidan hibsga olingan edi. Keyinchalik esa uning Solingondagi yongin voqeasiga ham aloqadorligi aniqlangan. Prokurorning so‘zlariga ko‘ra, hibsga olingan shaxs ilgari o‘sha yongin sodir bo‘lgan binoda istiqomat qilgan va ijara haqini to‘lamagani sababli u yerdan chiqarib yuborilgan.

Tergov organlari asosiy e'tiborni jinoyat qasos olish niyatida sodir etilgan bo‘lishi mumkinligi versiyasiga qaratmoqda. Dastlabki ma'lumotlarga ko‘ra, dushanba kuni sodir bo‘lgan mushtlashuvda o‘z tanishini og‘ir yaralagan shaxs hibsga olingan bo‘lib, bu voqea ikki hafta oldingi yonginga bevosita bog‘liq emas.

Prokuror Kaune-Gebhardt gumonlanuvchi shaxs giyohvandlik va boshqa huquqbuzarliklar bo‘yicha ham tergov qilinayotganini ta'kidladi. Shuningdek, hozircha tergovda bu jinoyat ortida "xorijiy fuqarolarga nisbatan adovat" alomatlari borligini tasdiqlovchi dalillar mavjud emasligi bildirildi. Voqeaning barcha tafsilotlari olib borilayotgan chuqur tekshiruvlar va so‘rovlardan so‘ng to‘liq ma'lum bo‘lishi kutilmoqda.