RTX 5090 xarid qilish qiyinlashdi! 🖥

AQShdagi mashhur Micro Center chakana savdo tarmogʻi Nvidia RTX 5090 grafik kartasini yoki uning komplektatsiyasiga ega shaxsiy kompyuterlarni sotib olmoqchi boʻlgan mijozlar uchun yangi talablarni joriy qildi. Endilikda xaridorlar ushbu qimmatbaho qurilmani qoʻlga kiritish uchun maxsus deklaratsiya toʻldirib, imzo chekishlari hamda davlat namunasidagi shaxsni tasdiqlovchi hujjatlarini skanerlash uchun taqdim etishlari talab etiladi. Ushbu yangi tartib dastlab Kaliforniyaning Tustin shahridagi doʻkonda qayd etilgan boʻlsa, keyinchalik Ogayo shtatining Kolumbus shahridagi filialda ham qoʻllanilayotgani maʼlum boʻldi. Shunga oʻxshash amaliyot boshqa ayrim savdo tarmoqlarida ham mavjudligi aytilmoqda.

Mazkur qoidaning joriy etilishidan asosiy maqsad – olibsotarlarning RTX 5090 grafik kartalari yoki ularni oʻz ichiga olgan tayyor kompyuterlarni xarid qilib, keyinchalik ularni Xitoyga qimmat narxlarda qayta sotishining oldini olishdir. Maʼlumki, bunday qurilmalar baʼzan yagona xarid imkoniyati boʻlib, spekulyantlar ularni chet elga olib chiqib daromad koʻrishga urinishadi. Hujjat va shaxsiy maʼlumotlarni tekshirish orqali AQShda yashamaydigan yoki mamlakatga qisqa muddatga kelib ketuvchi shaxslarning ushbu videokartani xarid qilib, oʻz yurtiga olib ketishiga toʻsqinlik qilinadi.

Biroq foydalanuvchilar va xaridorlar orasida bu masala boʻyicha fikrlar ikkiga boʻlingan. Reddit tarmogʻi muhokamalarida baʼzilar buni olibsotarlikka qarshi kurashdagi toʻgʻri qadam deb maʼqullagan boʻlsa, boshqalar shaxsiy maʼlumotlarni begona doʻkonga taqdim etish zarur emasligini aytib norozilik bildirishgan. Hatto ayrim xaridorlar bu jarayonni vaqtni behuda sarflash va kulgili holat deb atagan. Qolaversa, shartnoma yuridik kuchga ega emasligi va uni buzganlar uchun javobgarlik qanday boʻlishi nomaʼlumligicha qolmoqda.

Shuningdek, muhokamalarda keltirilishicha, Micro Center tarmogʻi har bir mijozga faqat bitta dona RTX 5090 videokartasini sotish boʻyicha qatʼiy cheklov oʻrnatgan. Ushbu qoidaga koʻra, xaridor hayoti davomida faqat bir martagina mazkur grafik tezlatgichni xarid qilish huquqiga ega ekanligi aytilmoqda.