Texnologiya va Gadjetlar

Yangi yil oldidan noutbuklar narxi oshadi 💻

7-okt 08:24 1 daqiqa 0

Yangi yil bayrami oldidan ehtiyot qismlar, valyuta kursi va logistika muammolari tufayli noutbuklar hamda elektronika narxi 10-15 foizga oshadi.

Yaqinlashib kelayotgan Yangi yil bayramlari arafasida Rossiyada elektronika mahsulotlari, xususan noutbuklar narxi 10-15 foizga qimmatlashishi kutilmoqda. "Izvestiya" nashrining o'z manbalariga tayanib xabar berishicha, mahsulotlarning ilk partiyalari allaqachon distributorlar tomonidan yangi qiymatlar asosida sotib olingan.

Narxlarning ko'tarilishiga bir qancha iqtisodiy omillar sabab bo'lmoqda. Birinchidan, rus importchilarining xorijiy hamkorlar bilan hisob-kitob qiladigan valyuta kurslari oshgan. Ikkinchidan, elektronika uchun zarur bo'lgan ehtiyot qismlar ham qimmatlashgan. Shuningdek, xorijiy banklarning Rossiyadan to'lovlarni amalga oshirishdan bosh tortishi va logistika zanjirlarining murakkablashuvi vaziyatni yanada og'irlashtirmoqda.

"MegaFon", diHouse hamda "Marvel-Distributsiya" kompaniyalari vakillari ham yangi xaridlarda mahsulot narxi 10-15 foizga oshishini tasdiqlashdi. "Xolodilnik.ru" tijorat direktori Aleksey Pogudalovning so'zlariga ko'ra, ishlab chiqaruvchilar narxlarni 15 foizgacha oshirish haqida allaqachon e'lon qilishgan. Uning ta'kidlashicha, narxlar telefon va noutbuklardan tortib yirik maishiy texnikagacha bo'lgan mutlaqo barcha turdagi mahsulotlar uchun qimmatlashadi.

Eslatib o'tamiz, bundan oldin 2024 yilning birinchi yarmida Rossiyada noutbuklar savdosi o'tgan yilning mos davri bilan solishtirganda pul ko'rinishida 30 foizga, dona jihatidan esa 14 foizga oshgani haqida xabar berilgandi. Oshgan davr mobaynida xaridorlar jami 94 milliard rubllik 1,4 million dona noutbuk sotib olishgan edi.

Manba / Источник: Yangiliklar