AQSh Moliya vazirligi kriptotalablarini o'zgartirdi 🇺🇸

AQSh Moliya vazirligining Moliya jinoyatlariga qarshi kurashish agentligi (FinCEN) tomonidan ilgari surilgan tashabbuslar kripto hamjamiyatda muhokamalarga sabab bo'lgan edi. Dastlab 2020-yilda moliyaviy muassasalar uchun banklar yoki birjalar emas, balki foydalanuvchilarning o'zi nazorat qiladigan nekastodial hamyonlar ishtirokidagi operatsiyalar bo'yicha hisobot berish talablari kiritilishi taklif qilingan edi. Unga ko'ra, moliyaviy tashkilotlar uch ming dollardan ortiq summadagi tranzaksiyalar bo'yicha ma'lumotlarni to'plashi va saqlashi hamda o'n ming dollardan oshadigan kriptooperatsiyalar yuzasidan FinCEN'ga hisobot taqdim etishi shartligi ko'zda tutilgan edi.

Keyinchalik, 2023-yilda Jo Bayden ma'muriyati davrida FinCEN tomonidan yana bir muhim qadam tashlandi. Regulyator xorijiy yurisdiktsiyalar ishtirokidagi kriptovalyutalarni mikslash amaliyotlarini pul yuvish bilan bog'liq alohida xavf sifatida tasniflashni taklif qildi va moliyaviy muassasalarni bunday tranzaksiyalar haqida hisobot berishga majburlamoqchi bo'ldi.

Biroq, Coin Center tashkiloti bu takliflar kriptooperatsiyalar uchun qo'shaloq standartlarni yuzaga keltirishi va fuqarolarning maxfiy ma'lumotlarini ommaviy yig'ilishiga sabab bo'lishini bildirdi. Huquq himoyachilarining fikricha, foydalanuvchilar mikserlardan o'z maxfiyligini himoya qilish maqsadida foydalanadi. Mutaxassislarning ta'kidlashicha, risklarni kamaytirishga intiladigan moliyaviy muassasalar hatto oddiy ichki amaliyotlar haqida ham hisobot berishga majbur bo'lib, bu halol foydalanuvchilar uchun hisoblarning bloklanishi kabi jiddiy oqibatlarga olib kelishi mumkin edi.

Shu bilan birga, Coin Center bundan avvalroq AQSh rasmiylarini kriptomikserlar dasturchilarini sudga berishdan tiyilishga chaqirgan edi. Huquq himoyachilari dasturiy ta'minot kodini e'lon qilishni ommaviy nutq yoki kitob nashr etish bilan tenglashtirib, bunday xizmatlardan yomon niyatli shaxslar foydalangan taqdirda ham dasturchilarni ta'qib qilmaslik kerakligini ta'kidlashgan.