Apple App Store'da PC emulatorlariga ruxsat berildi 💻

Apple kompaniyasi App Store ilohalarni ko'rib chiqish qoidalariga sezilarli o'zgartirishlar kiritdi va bu o'zgarishlar platformada emulyatorlar faoliyatini tubdan kengaytiradi. Joriy yilning 1-avgustidan boshlab kuchga kirgan yangi talablarga muvofiq, qoidalarning 4.7-bo'limiga rasman o'zgartirish kiritilib, endilikda ham retro konsollar, ham shaxsiy kompyuterlar (PC) emulatorlariga o'yinlarni yuklab olish imkoniyatini taqdim etishga ruxsat berildi.

Ushbu yangilanish joriy yilning bahorida amalga oshirilgan dastlabki o'zgarishlarning mantiqiy davomi hisoblanadi. O'sha paytda App Store'ga bir nechta emulyatorlarning kirib kelishiga yo'l ochilgan edi. Yangi tahrir qoidalarning 4.7, 4.7.2 hamda 4.7.3 bandlarini qamrab olib, ilovalarni rasmiy tasdiqlash jarayonida ushbu talablarga qat'iy rioya etilishini taqozo etadi. Mazkur shartlar, shuningdek, Yevropa Ittifoqidagi uchinchi tomon ilovalar do'konlari uchun mo'ljallangan emulyatorlarga ham taalluqli bo'lib, qoidalarning barcha platformalarda bir xil va izchil bo'lishini ta'minlaydi.

Apple tomonidan kiritilgan bu kabi yangiliklar PC emulyatorlari dasturchilari uchun ulkan imkoniyatlar eshigini ochmoqda. Eslatib o'tamiz, avvallari kompaniya iOS qurilmalarida shaxsiy kompyuter emulyatorlarini qat'iyan taqiqlab kelgan va bu dasturchilar hamjamiyatida ko'plab muhokamalarga sabab bo'lgan edi. Biroq o'tgan iyul oyida UTM SE emulyatorining App Store'da ma'qullangani kompaniya siyosatidagi o'zgarishlarning dastlabki belgisi bo'lgan edi.

Yangi qoidalar Apple ekotizimidagi emulyatsiya holatini yanada yaxshilashi kutilmoqda. Bu orqali iPhone va iPad foydalanuvchilari qonuniy va rasman tasdiqlangan emulyatorlar yordamida klassik o'yinlar hamda dasturlardan yanada kengroq foydalanish imkoniyatiga ega bo'ladilar.