TikTok mingdan ortiq qonunbuzar kontentni o‘chirdi 🚫

2023-yil boshidan buyon TikTok platformasi Roskomnadzor talabiga binoan mingdan ortiq taqiqlangan materiallarni oʻchirib tashladi. TASS agentligining regulyator maʼlumotlariga tayanib xabar berishicha, idora noqonuniy maʼlumotlarni bartaraf etmagani uchun ijtimoiy tarmoqni bir necha bor maʼmuriy javobgarlikka tortgan.

Oʻtgan davr mobaynida TikTok 659 ta qonunbuzar material hamda bolalar pornografiyasi, oʻz joniga qasd qilish va giyohvandlikni targʻib qiluvchi 80 ta kontentni olib tashladi. Joriy yil boshidan beri esa xizmat idora talabi bilan noqonuniy maʼlumotlar joylashgan yana 211 ta sahifani yopgan. Ushbu qoidabuzar harakatlar tufayli TikTok Pte. Ltd. kompaniyasiga umumiy hisobda 15,1 million rubl miqdorida jarima solingan boʻlib, shundan 13 million rubli joriy yilning oʻziga toʻgʻri keladi.

Ijtimoiy tarmoqlar va messenjerlar professional foydalanuvchilari assotsiatsiyasi Roskomnadzorga TikTokʼni Rossiya hududida bloklashni taklif qildi. Tashkilotning hisob-kitoblariga koʻra, mazkur platformaning rus segmentidagi auditoriya 30 million kishini tashkil etadi va blokirovka qilingan taqdirda mahalliy qisqa video xizmatlari shuuncha foydalanuvchiga ega chiqishi mumkin.

Eslatib oʻtamiz, 2022-yil mart oyida TikTok rossiyaliklar uchun monetizatsiya va maqsadli reklama joylashtirishni toʻxtatgan edi. Shuningdek, mamlakatdagi foydalanuvchilar uchun yangi videolarni yuklash yoki jonli efir ochish funksiyalari cheklangandi. 2023-yil oxiriga kelib ayrim foydalanuvchilarga kontent koʻrish va joylash huquqi qaytarildi, joriy yilning yanvarida esa baʼzilarga maqsadli reklama ishga tushirishga ruxsat berildi.

Moliyaviy koʻrsatkichlarga koʻra, TikTok 2020-yildan beri ilk bor Rossiyada rentabelligini yoʻqotdi. Oʻtgan yili kompaniya Rossiya boʻlinmasining tushumi qariyb 681 million rublni tashkil etgan, bu bir yil oldingi koʻrsatkichdan 3,4 baravar kamroq demakdir.