🤖 Apple Intelligence kutilgan natija bermadi

Apple kompaniyasining iOS 18 bilan birga taqdim etilgan yangi sun’iy intellekt tizimi Apple Intelligence o‘z oldiga qo‘yilgan vazifalarni to‘laqonli bajara olmadi va kutilgan natijani bermadi. Aslida ushbu paket oddiy yordamchi emas, balki foydalanuvchilarga keng imkoniyatlarni taqdim etuvchi ko‘p funksiyali tizim sifatida loyihalashtirilgan edi.

Biroq texnologik va apparat ta’minotidagi cheklovlar tufayli tizim dastlab faqatgina ikkita smartfon modelidagina ishlay boshladi. Shuningdek, shaxsiy ma’lumotlarni himoya qilish talablariga bog‘liq holda Yevropa bozoriga juda kech chiqqani va Siri ovozli yordamchisining yangi imkoniyatlari kiritilishi kechiktirilgani Apple uchun katta muammoga aylandi.

Sohadagi tahlilchilarning fikricha, Apple rahbariyati sun’iy intellekt paketining ko‘rsatkichlari yetarli darajada emasligini yaxshi tushunadi. Shu sababli yil boshida ta’minot zanjiri ishtirokchilariga ogohlantirish yuborilib, qurilmalar savdosida pasayish kuzatilishi mumkinligi bildirilgan. Mutaxassislar nafaqat iPhone 16, balki kelasi yil chiqarilishi kutilayotgan iPhone 17 turkumidagi qurilmalarda ham bu sun’iy intellekt to‘plami savdoda sezilarli ustunlik keltirmasligini taxmin qilmoqda.

Ayni paytda Google Gemini, Microsoft Copilot va ChatGPT kabi asosiy raqobatchilar o‘z texnologiyalarining eng ilg‘or versiyalarini foydalanuvchilarga taqdim etib bo‘ldi. Janubiy Koreyaning Samsung kompaniyasi ham Galaxy AI funksiyalarini tezkorlik bilan keng ko‘lamda tarqatib, xaridorlar e’tiborini qozondi. Yuzaga kelgan bunday vaziyat Apple kompaniyasining sun’iy intellekt sohasidagi raqobatda ortda qolayotganidan dalolat beradi.