Ishlayotgan onalar uchun xushxabar! 👶

So'nggi yillarda aholi sonining o'sish sur'ati pasayib borayotgani, ayollarning farzand ko'rish borasidagi xavotirlari hamda keksalar ulushining ortishi hukumat e'tiborini tortdi. Sabah nashri tarqatgan xabarga ko'ra, AK Partiyaning Markaziy qaror va ijroiya qo'mitasi yig'ilishida ishlayotgan onalarni qo'llab-quvvatlash masalalari muhokama qilindi.

Yig'ilishda ayollarning ham karyera qilishini, ham farzand tarbiyalashini ta'minlash uchun qator yordam choralari ko'rib chiqildi. Xususan, tug'ilish ta'tili muddatini uzaytirish, yarim kunlik ishlash imkoniyatini yaratish, uydan turib ishlash modelini joriy etish hamda onalarning moslashuvchan ish grafikidan foydalanishiga sharoit yaratish rejalashtirilmoqda. Bundan tashqari, onalarning mehnat stajidagi tanaffuslar byudjet mablag'lari hisobidan to'ldirib berilishi ko'zda tutilgan.

Qo'mita a'zolaridan biri ayollarning ayniqsa tug'ruqdan keyingi ta'til muddatlari bo'yicha talablariga to'xtalib o'tdi. Uning so'zlariga ko'ra, amaldagi to'rt oylik tug'ilish ta'tili juda qisqa bo'lib, farzandlar besh-olti yoshga to'lguniga qadar ularga yarim stavkada yoki masofadan ishlash imkonini berish hamda buning uchun mablag' ajratish zarur. Shuningdek, bir yillik ta'til varianti bilan birga ikki-uch yillik masofadan ishlash imkoniyatini ham muhokama qilib, amaliy qadamlar tashlash kerakligi ta'kidlandi.

Hazine va Moliya vaziri Mehmet Shimshek mazkur yo'nalishda tashlanadigan har qanday qadamni yuz foiz qo'llab-quvvatlashini ma'lum qildi. U jarayonga xususiy sektorni ham jalb etish lozimligini ta'kidladi. Moliya vaziri moliyalashtirish borasida hech qanday muammo yo'qligini, xususiy sektorga ham tegishli yordam ko'rsatilishini, xususan, ishdan bo'shash nafaqasiga e'tibor qaratilishini qayd etdi.