Galatasaray'dan tarixiy transfer qadami! 🦁

Trendyol Superliganing 29-turida o'z maydonida Caykur Rizesporni 6-2 hisobida taslim etib, g'alabali seriyasini davom ettirgan Galatasaray kelgusi mavsum uchun tarkibni kuchaytirish harakatini boshlab yubordi. Joriy mavsumda 24-chempionlikni qo'lga kiritishni maqsad qilgan Okan Buruk boshchiligidagi jamoa yozgi transfer oynasi uchun rejalarni tuzmoqda.

Klub mavsum oxirida tajribali darvozaboni Fernando Muslera bilan yo'llarini ajratishi kutilayotgani sababli yangi posbon qidiruviga kirishgan. Shu munosabat bilan o'tgan yozda Fenerbahcedan 5 million evro evaziga Angliyaning Manchester United jamoasiga o'tgan milliy darvozabon Altay Bayindir nishonga olindi.

A Spor tarqatgan xabarga ko'ra, ingliz grandida asosan zaxirada qolib ketayotgan futbolchini transfer qilish uchun Galatasaray rahbariyati muzokaralar stoliga o'tiradi. Joriy mavsumda Angliya klubi safida bor-yo'g'i 5 ta uchrashuvda maydonga tushgan darvozabon shundan 2 tasida o'z darvozasini dahlsiz saqlab qolgan.

Ingliz klubi bilan shartnomasi 2027 yilning 30 iyuniga qadar tuzilgan futbolchining hozirgi bozor qiymati 10 million evroni tashkil etadi. Manchester Unitedda asosiy tarkibdan joy ola olmayotgan Altay Bayindirning Turkiyaga qaytishni istayotgani aytilmoqda. Eslatib o'tamiz, darvozabon ilgari Fenerbahcedan ketayotgan paytda professional o'yinchi ekanini va kelajakdagi vaziyatga qarab ish tutishini ma'lum qilgan edi.