Microsoft ASD texnologiyasi endi barcha GPU'lar uchun ochiq 🚀

Microsoft kompaniyasi PC platformasi uchun ASD texnologiyasining imkoniyatlari kengaytirilganini e'lon qildi. Dastlab faqat AMD Radeon grafik kartalarida qo‘llab-quvvatlangan bu funksiya endi RTX, RTX Spark va Intel Arc seriyasidagi B video-kartalariga ham tatbiq etiladi. Shuningdek, yangilik Intel’ning o‘rnatilgan grafik qurilmalariga ham tegishli bo‘lib, bozordagi barcha asosiy GPU ishlab chiqaruvchilarni qamrab oladi.

Dastlab AMD bilan hamkorlikda yaratilgan texnologiya uchun AMD maxsus D3D12 State Object Compiler plaginini taqdim etdi. GPUOpen hamjamiyatida yuklab olish uchun ochiq bo‘lgan mazkur dasturiy ta'minot yaratuvchilarga Radeon kartalarida ASD qo‘llab-quvvatlanadigan o‘yinlarni oldindan tayyorlashga ko‘maklashadi. Plagin yig‘ish, sinovdan o‘tkazish va tarqatish kabi uchta asosiy bosqichni osonlashtiradi.

O‘yin hali savdoga chiqmagan taqdirda ham plagin yordamida lokal ravishda sheyderlar bazasini tayyorlab, tayyor offlayn ma'lumotlar bazasini olish mumkin. Bunda bulutli ishlov berish talab etilmaydi, bu esa o‘yin dvigateli, drayver va apparat ta'minotining o‘zaro muvofiqligini tekshirish imkonini beradi.

O‘tgan yili ROG Xbox Ally qurilmasi bilan birgalikda taqdim etilgan ASD (Advanced Shader Delivery) texnologiyasi iyun oyida shaxsiy kompyuterlar uchun ham kengaytirilgan edi. Forza Horizon 6 o‘yinida o‘tkazilgan sinovlar uning samaradorligini yaqqol ko‘rsatdi: R7 5800 protsessori va RX 7600 videokartasi qo‘llanilgan testda yuklanish vaqti 95 foizga kamayib, 1,5 daqiqadan 4 soniyagacha qisqardi. Shuningdek, texnologiya sheyderlarni kompilyatsiya qilish jarayonini chetlab o‘tib, o‘yinlardagi kutilmagan qotishlar va diltirishlarning oldini oladi.