Olaf Shols Putin bilan muloqotga tayyor 🇩🇪

Germaniya kansleri Olaf Shols Ukrainadagi harbiy harakatlar fonida Rossiya prezidenti Vladimir Putin bilan muloqotni qayta tiklash ehtimoli haqida gapirdi. Yakshanba kuni kechqurun ARD telekanalining Caren Miosga ko'rsatuvida qatnashgan hukumat rahbari o'z pozitsiyasini ma'lum qildi.

Siyosatchining ta'kidlashicha, u Rossiya rahbari bilan yaqin kelajakda gaplashishga tayyor. Biroq, Shols mas'uliyatli siyosatchi sifatida bu muzokaralarni yakka o'zi olib bormasligini, jarayon Ukraina va boshqa manfaatdor tomonlar ishtirokida kechishi lozimligini qayd etdi. Putin bilan rasmiy suhbatdan oldin Kiyev bilan hamkorlikda keng ko'lamli tayyorgarlik va maslahatlashuvlar o'tkazilish zarurligi tushuntirildi.

Tok-shou boshlovchisining Rossiya rahbari bilan muloqot qilish uchun qulay fursat qachon kelishi haqidagi savoliga kansler aniq sana keltirmadi va faqatgina bu «tez orada» ro'y berishini bildirdi. Shu bilan birga, Germaniya Ukrainani qo'llab-quvvatlashda davom etishi va mamlakat yolg'iz qolishidan xavotir olmasligi kerakligini qo'shimcha qildi.

Kanslerning fikricha, hozirgi vaziyatda urushning yanada kuchayishi va uning nazoratdan chiqib ketishining oldini olish asosiy vazifa hisoblanadi. Shuningdek, mojaro cheksiz davom etadimi yoki unga barham berish choralarini topish imkoni bormi, shuni ko'rib chiqish muhimdir.

Ma'lumot uchun, Olaf Shols va Vladimir Putin o'rtasidagi so'nggi telefon muloqoti bundan ikki yil avval, aniqrog'i 2022 yilning dekabr oyida kuzatilgan edi. O'shanda Germaniya tomoni rus qo'shinlarini Ukraina hududidan chiqarib yuborishga chaqirgan edi. Joriy yilning iyun va oktyabr oylarida esa Shols adolatli shartlar asosida muzokaralar o'tkazishga qarshi emasligini bir necha bor ta'kidlagandi. O'z navbatida Kreml ham muloqot uchun eshiklar ochiqligini ma'lum qilgan.