Pixel 10a narxi 100 dollarga qimmatlashdi 📱

Google kompaniyasi o'zining o'rta segmentga mo'ljallangan Pixel 10a smartfoni narxini kutilmaganda 100 dollarga oshirdi. Bugundan boshlab Google Store do'konida ushbu gadjetning boshlang'ich narxi avvalgi 499 dollar o'rniga 599 dollarni tashkil etmoqda. Mutaxassislar bu qadamni hozirgi vaqtda xotira kabi asosiy butlovchi qismlarning tannarxi keskin oshgani bilan izohlamoqda. Biroq, kompaniya narxlar oshishining rasmiy sabablari bo'yicha hozircha izoh bergani yo'q.

Avvalroq Google yangi Pixel 11 turkumidagi barcha qurilmalar avvalgi avlodga nisbatan qimmatlashishini tasdiqlagan edi. O'shanda kompaniya bu holat bozorlardagi boshqa Pixel telefonlariga ham ta'sir ko'rsatishini aytib o'tgan edi. Hozirgi vaqtda 128 GB xotiraga ega boshlang'ich Pixel 10a modeli 599 turganda, 256 GB hajmli versiya 699 dollarga baholanmoqda.

Yangi narx siyosati allaqachon Amazon va Best Buy kabi yirik savdo maydonchalarida o'z kuchiga kirdi. Shuningdek, Google Store ma'lumotlariga ko'ra, qurilma narxi Kanadada 849 dollargacha, Buyuk Britaniyada 599 funt sterlinggacha va Yevropada 649 yevrogacha ko'tarilgan.

Mutaxassislarning fikricha, narxning 100 dollarga sakrashi qurilmaning raqobatbardoshligiga ta'sir qilishi mumkin, chunki smartfon ikkita avlod oldingi Tensor G4 protsessoridan foydalanadi. Shu bilan birga, bozordagi boshqa texnologiya gigantlari ham o'z mahsulotlari narxini oshirmoqda. Xususan, shu hafta Samsung ham o'zining flagman va o'rta narxli Galaxy qurilmalari narxlarini ko'targani ma'lum bo'ldi.