Nintendo va Microsoft munosabatlari 🎮

Nintendo kompaniyasi Amerika korporatsiyasi bilan o'zaro aloqalar juda mustahkam ekanini va uni asosiy nashriyot hamkorlaridan biri sifatida ko'rishini ma'lum qildi. Bu haqda Nintendo of America rahbari Daq Bauzer o'yin sanoatidagi so'nggi jarayonlar va hamkorlik haqidagi savolga javob berar ekan ma'lum qildi.

Bauzerning so'zlariga ko'ra, ikki kompaniya o'rtasidagi munosabatlar yuqori bosqichda turibdi va bunga Nintendo Switch konsolining o'zi yaqqol dalil bo'la oladi. Misol tariqasida Switch uchun Minecraft o'yinini sotib olish imkoniyati hamda Banjo va Kazui qahramonlarining Super Smash Bros. Ultimate loyihasiga qo'shilgani keltirib o'tildi. Rahbar bu sheriklik kelgusida yanada rivojlanishiga umid bildirdi.

Shuningdek, sanoatdagi yirik bitimlar va kompaniyalarning qo'shilib ketishi masalasiga to'xtalarkan, Bauzer 16 yillik tajribasi davomida studiyalar doim bir-birini sotib olgani va bu o'yin bozorining tabiiy jarayoni ekanini ta'kidladi. Uning fikricha, eng muhimi — geymerlar doim sifatli kontent bilan ta'minlanib kelmoqda.

Avvalroq sud hujjatlari orqali Microsoft rahbari Fil Spenserning Nintendo'ni sotib olish istagi borligi haqidagi ichki yozishmalari fosh bo'lgan edi. Biroq Bauzer bu ma'lumotni izohlamadi. Shunga qaramay, tomonlar o'rtasida amalda mustahkam ko'p yillik hamkorlik mavjud bo'lib, bungacha Switch konsolida Xbox nashr etgan Ori o'yinlari ham chiqqan edi. Bundan tashqari, Nintendo Activision Blizzard savdosi davrida Microsoft'ni qo'llab-quvvatlab, o'yinlarni o'z platformalarida chiqarish bo'yicha 10 yillik shartnoma imzolagan birinchilardan biri bo'lgandi.