Arnold Shvartsenegger sport zalida sun'iy intellekt bo'lib ko'rsatdi 🤖

Mashhur aktyor va sobiq siyosatchi Arnold Shvartsenegger Kaliforniyaning Venetsiya shahridagi Gold's Gym sport zalida qiziqarli hazil uyushtirdi. "Terminator" filmidagi kiborg roli orqali tanilgan aktyor bu safar muxlislar bilan muloqot qilish uchun o'ziga xos usulni tanladi. U yerga kelganlar o'zlarini aktyorning yangi kitobi asosida yaratilgan sun'iy intellekt modeli bilan gaplashayotganiga ishonishgan.

Tashrif buyuruvchilar ovozli ekran qarshisiga o'tirib, Shvartseneggerning ovoziga taqlid qiluvchi tizimdan maslahat so'rashdi. Odamlar motivatsiya, shaxsiy maqsadlarni belgilash va professional bodibilding bo'yicha savollar yo'llashdi. Jumladan, ayrimlar nikohni saqlab qolish va farzand tarbiyasi haqida ham qiziqishdi.

Biroq, ekranning ortida hech qanday sun'iy intellekt yoki katta til modeli yo'q edi. Savollarga to'g'ridan-to'g'ri aktyorning o'zi jonli ravishda javob qaytardi. Suhbat yakunida Shvartsenegger quticha eshigini ochib, hayratda qolgan muxlislariga o'zining shaxsan o'zi ekanini ko'rsatdi va mashhur kinolaridagi iboralarni takrorladi.

Adweek nashrining ma'lumotiga ko'ra, mazkur tadbir 29-sentabr kuni Nyu-Yorkdagi Orchard Creative reklama agentligi tashabbusi bilan amalga oshirilgan. Agentlik rahbari Berni Robinsonning ta'kidlashicha, ushbu loyiha orqali aktyor insonlarning cheksiz imkoniyatlariga ishonishi va ularga yordam berishni istashini ko'rsatib bergan.