💵 Dollar indeksi korreksiyasi yakunlandi

O'tgan haftaning birinchi yarmida kuzatilgan dollar indeksining faol pasayishi ikkinchi yarmidagi jadal o'sish evaziga to'liq qoplandi. Natijada, o'tgan hafta dollar indeksi 0,51% o'sish ko'rsatib, 112,66 punkt belgisida yakunlandi.

Yangi chorak boshida dollar boshqa valyutalar kursiga nisbatan biroz pasayishni boshdan kechirdi. Treyderlar AQSh iqtisodiyotidagi sekinlashuv Federal zaxira tizimini stavkalarni oshirish traektoriyasini pasaytirishga majbur qiladimi yoki yo'qmi degan savollarni muhokama qilishmoqda. Bu davlat obligatsiyalarida rallini keltirib chiqarib, ularning daromadliligi pasayishiga olib keldi. Biroq o'tgan hafta oxiriga kelib 10 yillik g'azna obligatsiyalarining daromadliligi yana o'sishni boshladi va juma kungi yopilishda 3,88% ni tashkil etdi.

Fed vakillari o'z bayonotlarida inflyatsiyani jilovlash uchun zarur choralar ko'rilishini ta'kidladilar. Xususan, San-Frantsisko FBR rahbari Meri Deyli va Vashingtondagi boshqaruv kengashi a'zosi Filip Jefferson mehnat bozoridagi yo'qotishlarga tayyor turish kerakligini bildirdilar. Minnapolis FBR prezidenti Nil Kashkari ham Markaziy bank foiz stavkalarini oshirishni to'xtatishga hali yetib kelmaganini qayd etdi. CME'ning FedWatch vositasiga ko'ra, bozor noyabr oyidagi yig'ilish yakunlari bo'yicha stavkalar 75 bazis punktga oshish ehtimolini 80% atayotir.

Makroiqtisodiy statistikaga ko'ra, o'tgan haftada ishsizlik bo'yicha dastlabki arizalar soni 219 mingtani tashkil etdi. Mehnat vazirligi ma'lumotlariga ko'ra, sentyabr oyida mamlakatda ish o'rinlari 263 mingtaga ko'paydi, bu 2021 yil aprelidan beri eng past sur'at hisoblanadi. Shunga qaramay, sentyabr oyida ishsizlik darajasi 3,5% gacha pasaydi. Shuningdek, sentyabr oyida AQShda ishlab chiqarish sektoridagi ishbilarmonlik faolligi indeksi 50,9 punktgacha tushib, 2020 yil mayidan beri eng past darajani qayd etdi.