🤖 Ilon Mask OpenAI'ga qarshi yana sudga murojaat qildi

OpenAI asoschilaridan biri boʻlgan Ilon Mask kompaniya va uning bosh direktori Sem Altman ustidan mart oyida sudga daʼvo qoʻzgʻatgan edi. Oshkora kelishuvlarga koʻra, OpenAI notijorat tashkilot sifatida qolishi lozimligi, biroq tijorat tuzilmasiga aylanib shartnomani buzayotgani mazkur qadamga asos qilib koʻrsatilgandi. Shundan soʻng OpenAI tezkor javob qaytarib, aslida Maskning oʻzi biznes daromad keltiruvchi tuzilma boʻlishini istagani hamda kompaniya rahbari boʻlishni rejalashtirganini maʼlum qilgan edi. Biroq iyun oyida Ilon Mask hech qanday sabab keltirmasdan mazkur suddan voz kechganini eʼlon qilgandi.

Oradan koʻp oʻtmay tadbirkor Sem Altman va boshqaruvchi Greg Brokman hamda OpenAI kompaniyasiga qarshi yana bir yangi sud daʼvosini boshlashga qaror qildi. The New York Times nashrining xabar berishicha, ushbu yangi daʼvo mazmuniga koʻra avvalgisiga juda oʻxshash hisoblanadi. Yangi hujjatda OpenAI oʻz sunʼiy intellekt modellarining kodini ochiq manbali loyiha sifatida taqdim etish majburiyatini bajarmagani, buning oʻrniga Microsoft korporatsiyasiga eksklyuziv litsenziya bergani qattiq qoralanadi. Microsoft mazkur texnologiyalardan oʻzining Copilot kabi generativ sunʼiy intellekt xizmatlarida foydalanib kelmoqda.

Maskning huquqshunosi Mark Toberoffning matbuotga maʼlum qilishicha, yangi daʼvoda OpenAI AQShning shantajga qarshi qonunlarini buzgani ham daʼvo qilinmoqda. U kompaniya Ilon Maskni aldash maqsadida jinoiy til biriktirganini iddao qilib, avvalgi daʼvo jiddiy emasligini va oʻzi bunday yondashuvlarga ishonmasligini alohida taʼkidladi. Hozircha OpenAI rahbariyati ushbu yangi sud daʼvosi yuzasidan oʻz munosabatini bildirgani yoʻq.

Shuningdek, daʼvo materiallarida taʼkidlanishicha, agar Microsoft kompaniyasi OpenAI sunʼiy intellekti umumiy sunʼiy intellekt darajasiga yetganiga ishonsa, uning modellarini litsenziyalash huquqi tugatilishi kerakligi talab qilinmoqda. Shu sababli sudga murojaat qilib, OpenAI oʻz modellarida ushbu bosqichga yetib borgan yoki bormaganini aniqlab berishni soʻrashmoqda. Agar texnologiya bunga erishgan boʻlsa, Microsoft bilan tuzilgan amaldagi shartnomani rasman bekor qilish choralari koʻrilishi mumkin.