New Yorkda fosil yoqilgidan voz kechiladi 🏙️

Nyu-York shahrida havo sifatini yaxshilash va ekologik muammolarni bartaraf etishga qaratilgan muhim qadam tashlandi. Shahardagi mavjud havoning ifloslanishi aholi salomatligiga jiddiy taʼsir koʻrsatib, yillik 21,7 milliard dollarlik qoʻshimcha sogʻliqni saqlash xarajatlarini keltirib chiqarmoqda. Shuningdek, bu holat bolalardagi astma kasalligining beshdan bir qismiga sabab boʻlayotgani aniqlangan. Bugungi kunda shahardagi umumiy chiqindilarning 30 foizi aynan binolar hissiga toʻgʻri keladi.

Mazkur ifloslanishning asosiy omillari sifatida tabiiy gaz, mazut qozonlari va gaz plitalari koʻrsatilmoqda. Qabul qilingan yangi qonunga muvofiq, kelgusida quriladigan yangi binolarda bu tizimlar oʻrniga elektr energiyasida ishlaydigan issiqlik nasoslari, induksion pechlar va shunga oʻxshash zamonaviy texnologiyalar qoʻllanilishi shart etib belgilanadi.

Dastlabki bosqichda qurilish xarajatlari biroz ortishi kutilayotgan boʻlsa-da, energiya toʻlovlarining pastligi evaziga bu farq 10 yil ichida qoplanishi taxmin qilinmoqda. 30 yil yakuniga kelib эsa har bir xonadon oʻrtacha 5 ming dollar miqdorida mablagʻ tejashiga erishiladi. Shuningdek, ushbu qonun binolar tomi va fasadiga quyosh panellarini oʻrnatishni ham bilvosita ragʻbatlantiradi, chunki fuqarolar oʻz elektr energiyasini ishlab chiqarish orqali xarajatlarini kamaytirishi mumkin.

Biroq yangi qonun barcha obyektlarni ham qamrab olmaydi. Restoranlar, tibbiyot muassasalari, fabrikalar va qishloq xoʻjaligi binolari ushbu majburiyatdan istisno qilingan. Shuningdek, hozirda mavjud boʻlgan fosil yoqilgʻida ishlaydigan binolarga nisbatan ham cheklovlar qoʻllanilmaydi, qoida faqat yangi qurilmalarga tegishli. Agar kelgusida elektr tarmoqlari yetarli quvvat yetkazib bera olmasa, yangi binolarga ham ayrim istisnolar berilishi mumkin.