📉 Blokcheyn tarmoklarining daromadlari pasaydi 🪙

Kriptovalyuta bozoridagi so'nggi ma'lumotlar tahlili ko'plab blokcheyn tarmoqlarining faolligi va daromadlari past darajada qolayotganini ko'rsatmoqda. DefiLlama tahliliy platformasi taqdim etgan so'nggi statistikaga ko'ra, bir kecha-kunduz ichida kuzatuv ostidagi jami 558 ta blokcheyn tarmoqlarining mutlaq ko'pchiligi juda kam miqdorda komissiya yig'imlarini qo'lga kiritgan.

Xususan, o'tgan 24 soatlik davr mobaynida 514 ta blokcheynda olingan komissiya to'lovlari miqdori 1000 AQSh dollaridan kam bo'lganini ko'rsatdi. Tarmoqlarning sezilarli qismida moliyaviy ko'rsatkichlar bundan ham past darajada qayd etilgan. Xususan, 443 ta tarmoqda kunlik komissiya yig'imi 10 dollardan ham oshmagan bo'lsa, naq 399 ta blokcheynda bu ko'rsatkich nolga teng ekanligi aniqlandi.

Bozordagi umumiy turg'unlik fonida faqatgina sanoqli loyihalargina sezilarli daromad olishga muvaffaq bo'lgan. Olingan ma'lumotlarga ko'ra, so'nggi bir sutka davomida 100 000 dollardan ortiq komissiya yig'ishga erishgan tarmoqlar soni atigi yettitani tashkil etdi.

Mazkur davr mobaynida Solana tarmog'i mutlaq yetakchi sifatida qayd etildi. Ushbu mashhur blokcheyn bir kecha-kunduz ichida 1,09 million dollar miqdorida komissiya yig'ib, qolgan raqobatchilaridan yaqqol o'zib ketishga erishdi. Qolgan tarmoqlar esa bundan ancha kam natijalarni qayd etishgan.