Rossiya TIV "maxsus operatsiya" qachon tugashini aytdi 🇷🇺

Rossiya Tashqi ishlar vazirligi vakili Ukrainadagi harbiy harakatlar qachon yakuniga yetishi haqida rasmiy bayonot berdi. Rossiya TIVning MDH mamlakatlari bo'yicha ikkinchi departamenti direktori Aleksey Polishchukning ma'lum qilishicha, mamlakatning maxsus harбий operatsiyasi belgilangan vazifalar to'liq bajarilgandan so'nggina o'z nihoyasiga yetadi.

Diplomatning so'zlariga ko'ra, asosiy maqsadlar qatoriga Donbass tinch aholisini himoya qilish, Ukrainani demilitarizatsiya hamda denatsifikatsiya qilish kiradi. Shuningdek, Ukraina hududi orqali NATO davlatlari tomonidan Rossiya xavfsizligiga solinayotgan tahdidlarni butunlay bartaraf etish ham muhim shartlardan biri sifatida ko'rsatilgan. Polishchuk operatsiya reja asosida davom etayotgani va oldinga qo'yilgan barcha vazifalar muvaffaqiyatli bajarilishini alohida ta'kidlab o'tdi.

Eslatib o'tamiz, joriy yilning 24-fevral kuni Rossiya Prezidenti Vladimir Putin Ukrainada maxsus harbiy harakatlar boshlanganini e'lon qilgan edi. U o'sha paytda asosiy maqsad sifatida Ukraina hududini qurolsizlantirish hamda mahalliy aholini himoya qilishni ko'rsatgandi. Keyinchalik, 19-aprelda tashqi ishlar vaziri Sergey Lavrov ushbu harakatlarning navbatdagi bosqichi boshlanganini ma'lum qilib, jarayonda yadro qurolidan foydalanish rejalashtirilmaganini qo'shimcha qilgandi.

Shu bilan birga, boshqa davlat rahbarlari va rasmiylari mazkur mojaroning davomiyligi borasida turli prognozlarni ilgari surishgan. Xususan, AQSh davlat kotibi Entoni Blinken harbiy harakatlar 2022 yil oxirigacha cho'zilishi mumkinligini taxmin qilgan bo'lsa, Ukraina Prezidenti Vladimir Zelenskiy o'z mamlakati Rossiyaga qarshi yana o'n yil davomida kurashishga tayyorligini bildirgan edi.