MAX ilovasini QR-kodlar orqali tarqatish taklif qilindi 📱

Rossiya Davlat Dumasining axborot siyosati qo‘mitasi raisi o‘rinbosari Andrey Svintsov MAX ilovasini banklar, mobil savdo nuqtalari va umumiy ovqatlanish shoxobchalarida maxsus QR-kodlar orqali tarqatish tashabbusi bilan chiqdi. Ushbu chora Google Play va App Store platformalaridan Rossiya ilovalari olib tashlanganiga qarshi javob choralari sifatida ko‘rib chiqilmoqda.

Svintsovning ta'kidlashicha, MAX va VK ilovalarining Google Play tarmog‘idan o‘chirilishi App Store ilgarigi qadamidan keyin kutilgan holat edi. Uning so‘zlariga ko‘ra, Rossiya hukumati va Roskomnadzor ilovalarni olib tashlagan xalqaro kompaniyalarni sudga berib, ularga jarima solishi ham mumkin.

Deputat fuqarolarga ilovalarni mahalliy RuStore do‘konidan yuklab olishni maslahat berdi. To‘liq o‘zimizning muqobil analoglar bazasi yaratilgunga qadar esa Xitoy yoki Braziliya kabi "do‘st" davlatlarning IT-tizimlariga tayanib turish vaqtincha chora bo‘lishi mumkinligini bildirdi.

Siyosatchining fikricha, Rossiya bundan 20-25 yil muqaddam Xitoy bosib o‘tgan o‘zining mustaqil IT-perimetrini barpo etish yo‘lidan bormoqda. Uning baholashicha, asosiy analoglarni to‘liq yakuniga yetkazish uchun taxminan besh yil talab etiladi, biroq mutlaqo avtonom tizimlarni yaratish o‘nlab yillarga cho‘ziladigan vazifadir.

Svintsov hamkorlik tamoyiliga asoslanib ish ko‘rishni taklif qildi. Unga ko‘ra, banklar, mobil savdo nuqtalari, restoranlar tarmog‘i, umumiy ovqatlanish maskanlari va "Gosuslugi" portali bilan kollaboratsiyalar tashkil etilib, istalgan joyda fuqarolar QR-kod yordamida ilovani yuklab olishi yoki yangilab olishi imkoniyati yaratilishi lozim.