🇺🇿 Zelenskiy barcha rossiyaliklar uchun chegaralarni yopishga chaqirdi

Ukraina prezidenti Vladimir Zelenskiy The Washington Post nashriga bergan intervyusida Gʻarb davlatlariga barcha Rossiya fuqarolari uchun oʻz chegaralarini yopish tashabbusi bilan chiqdi. Uning taʼkidlashicha, joriy etilgan barcha sanksiyalar Rossiya aholisi uchun bir yillik chegara taqiqi hamda energiya resurslari sotib olishga toʻliq embargo qoʻyish fonida juda kuchsiz koʻrinadi.

Zelenskiyning fikricha, ruslar oʻz dunyoqarashini oʻzgartirmaguncha oʻz hududlarida yashashi kerak, chunki eng muhim cheklov aynan chegaralarni yopishdan iboratdir. Ukraina yetakchisi butun rossiyaliklar aholisini yakkalab qoʻyish orqali ularni masʼuliyatga tortish mumkinligini, bu esa amaldagi siyosatga taʼsir oʻtkazishning yagona samarali yoʻli ekanini qayd etdi.

Eslatib oʻtamiz, avvalroq Yevroittifoq rasmiy shaxslar va tadbirkorlar uchun viza rejimining soddalashtirilgan tartibini toʻxtatgan edi. Shuningdek, Estoniya, Latviya va Finlandiya kabi qator davlatlar vakillari rossiyaliklarga umuman viza bermaslik tarafdori boʻlgan.

Biroq Yevrokomissiya ushbu cheklovlar YeI qoidalariga zid kelishini bildirib, vizalarni toʻliq toʻxtatishni istisno qilgan. Xususan, gumanitar holatlar, Yevroittifoq fuqarolarining yaqin qarindoshlari, jurnalistlar va dissidentlar uchun istisnolar zarurligi taʼkidlangan. Shunga qaramay, Belgiya, Malta, Niderlandiya, Latviya, Литva, Chexiya hamda Estoniya kabi davlatlarning elchixonalari va viza markazlari allaqachon rossiyaliklar uchun qisqa muddatli Shengen vizalarini rasmiylashtirishni cheklashga ulgurgan.