Pixel 10a narxi 100 dollarga qimmatlashdi 📱

Google kompaniyasi o'rta sinfga mansub Pixel 10a smartfoni narxini hech qanday rasmiy bayonotsiz 100 dollarga oshirdi. Bugundan boshlab Google Store do'konida ushbu qurilmaning boshlang'ich narxi 499 dollardan 599 dollarga ko'tarildi. Mutaxassislar buni butun dunyo bo'ylab butlovchi qismlar, xususan, xotira narxlarining keskin oshib ketgani bilan izohlamoqda. Shunga qaramay, kompaniyaning o'zi narx siyosatidagi bu o'zgarish bo'yicha hozircha hech qanday rasmiy izoh bergani yo'q.

Avvalroq Google yangi Pixel 11 modellari avvalgi avlodga nisbatan qimmatroq bo'lishini ma'lum qilgan edi. O'shanda kompaniya bu holat vaqt o'tishi bilan bozordagi boshqa Pixel qurilmalariga ham ta'sir ko'rsatishi mumkinligini aytib o'tgan edi. Hozirgi vaqtda Pixel 10a modelining 128 gigabaytli asosiy versiyasi 599 dollardan sotilayotgan bo'lsa, 256 gigabaytli talqini uchun xaridorlar 699 dollar to'lashiga to'g'ri keladi. Yangi narxlar allaqachon Amazon va Best Buy kabi yirik savdo maydonchalarida ham joriy etildi.

Xalqaro bozorlarda ham narxlar o'zgargani kuzatilmoqda. Xususan, Google Store ma'lumotlariga ko'ra, Kanadada Pixel 10a narxi 849 dollarni, Buyuk Britaniyada 599 funt sterlingni, Yevropada esa 649 yevroni tashkil qilmoqda. Eslatib o'tamiz, avvalgi sharhlarda ushbu smartfon 499 dollarlik narxi uchun yaxshi tanlov deb baholangan edi. Biroq narxning 100 dollarga oshishi, ayniqsa qurilmada ikki avlod eski bo'lgan Tensor G4 protsessori ishlatilganini hisobga olganda, uning raqobatbardoshligiga ta'sir qilishi mumkin. Shu hafta boshida Samsung ham o'zining flagman va o'rta darajadagi Galaxy qurilmalari narxini oshirgan edi.