Samsung Galaxy F15 5G Geekbench'da 📱

O'tgan yilning dekabr oyida Hindistonda Galaxy A15 5G modelini taqdim etgan Samsung endilikda Galaxy F15 5G smartfonini chiqarishga tayyorgarlik ko'rmoqda. Yaqinda ushbu yangi qurilma Geekbench sinov dasturida ko'rinish berdi va uning ba'zi texnik xususiyatlari oshkor bo'ldi.

Ma'lumotlarga ko'ra, smartfon protsessor chastotasiga tayanilsa, A15 5G modelidagi kabi 6 nanometrli MediaTek Dimensity 6100+ protsessori hamda Arm Mali-G57 MC2 grafik chipi bilan ta'minlanadi. Shuningdek, benchmark ro'yxatida qurilmaning One UI 6.0 grafik qobig'iga asoslangan Android 14 operatsion tizimi va 4 Gb tezkor xotiraga egaligi ko'rsatilgan. Galaxy A15 5G modeli 8 Gb gacha tezkor xotiraga ega ekanligini hisobga olsak, F15 5G uchun ham 6 Gb va 8 Gb variantlari chiqishi kutilmoqda.

Smartfonning qolgan xususiyatlari avvalgi modelga o'xshash bo'lishi taxmin qilinmoqda. Xususan, qurilma 90 Gts yangilanish chastotasiga ega 6.5 dyuymli FHD+ Infinity-U Super AMOLED displeyi, 50 megapikselli asosiy kameraga ega uchlik orqa kamera bloki va yon qismiga o'rnatilgan barmoq izi skaneri bilan jihozlanishi mumkin.

Hafta boshida tarqalgan render suratlarga ko'ra, Galaxy F15 5G biroz yumaloqlashtirilgan dizaynga ega bo'lib, qora, binafsha va yashil ranglarda sotuvga chiqariladi. Shuningdek, smartfon A15 5G dagi 5000 mA/soatlik akkumulyatordan farqli ravishda 6000 mA/soat sig'imli batareya va 25 vattli tezkor quvvatlash texnologiyasini qo'llab-quvvatlashi aytilmoqda. Hozirda qurilma BIS sertifikatidan o'tgani va Hindistondagi Samsung qo'llab-quvvatlash sahifasida paydo bo'lgani uning taqdimoti yaqinligini anglatadi.