Rossiya hukumatida raqamli rublda maosh berila boshlandi 🇷🇺

Rossiya hukumatining ma'lum qilishicha, mamlakatda xodimlar o'z xohishiga ko'ra raqamli rublda maosh olishni boshladilar. Moliya vazirligi bu jarayon majburiy emasligini, har bir shaxs faqat o'z xohishi bilan raqamli valyutada maosh olishi mumkinligini alohida ta'kidladi. Bunday mablag'larni qabul qilish uchun xodimlar Rossiya Banki platformasida mustaqil ravishda hisob raqamlari ochadilar.

Shu paytgacha davlat xizmatkorlari va budjet tashkilotlari xodimlariga markaziy bank raqamli valyutasida (CBDC) ish haqi faqat test rejimida berib kelingan edi. Mazkur sinovlar o'tgan yili Moliya vazirligi hamda Federal g'aznachilik tomonidan boshlangan bo'lib, ular doirasida nafaqat maoshlar, balki stipendiyalar va davlat kontraktlari bo'yicha ayrim hisob-kitoblar ham amalga oshirilgan. Vazirlik ma'lumotiga ko'ra, 2025 yilda bu kabi operatsiyalarning umumiy hajmi qariyb 16 million rublni tashkil etgan.

Joriy yilning 1 sentyabridan boshlab yirik banklar va yirik chakana savdo kompaniyalari o'z mijozlari uchun raqamli rublda o'tkazmalar va to'lovlarni amalga oshirish infratuzilmasini ochishga majbur etib belgilandi. Yanvar oyidan e'tiboran esa federal budjet xarajatlari raqamli rubllarda cheklanmagan bo'lib, federal va avtonom muassasalar ular yordamida hisob-kitob qilishi mumkin. Shuningdek, barcha federal budjet va avtonom muassasalar raqamli rublda to'lovlarni qabul qilish majburiyatiga ega, CBDC mablag'laridan budjetga to'lovlar uchun ham foydalanishga ruxsat etiladi.

Yaqinda Rossiya Prezidenti Vladimir Putin Moliya vazirligi va Markaziy bankka aholiga raqamli rublning afzalliklari haqida batafsilroq ma'lumot berishni topshirdi. Bundan avvalroq Markaziy bank raisi o'rinbosari Zulfiya Kahrumanova asosiy moliyaviy regulyator raqamli rubldagi onlayn hamyondan to'g'ridan-to'g'ri bankomatdan naqd pul yechib olishga ruxsat bermoqchi ekanini e'lon qilgan edi.