⚖️ Uy-joydan ko‘chirish ishlari keyinga qoldirildi

Fuqarolik ishlari bo‘yicha Ohangaron tumanlararo sudining ijro varaqasiga asosan, qarzdor Bahodir Almatov va uning oila a’zolarini uydan majburiy tartibda ko‘chirish belgilangan edi. Mazkur ko‘chirish ishlari uydan foydalanish huquqiga ega bo‘lgan undiruvchi Fotima Petron nomidagi mulkka qaratilgan bo‘lib, jarayon Toshkent viloyati Angren shahrida amalga oshirilishi lozim edi.

Ijro ishi doirasida taraflarga tegishli tartibda xabar berilgan. Dastlab 2021 yil 8 apreldagi sud qarori bilan ijro ishi to‘xtatilib, keyinchalik 20 apreldagi sud ajrimiga ko‘ra uni 5 iyunga qadar kechiktirib turish belgilangan edi. Biroq sudning qo‘shimcha qarori bo‘lmagani sababli, 8 iyun kuni ko‘chirish harakatlarini boshlash rejalashtirilgan, biroq javobgar tomonidan qarshilik ko‘rsatilgani bois jarayon 9 iyun kuniga surilgan.

Belgilangan muddatda ko‘chirish ishlari davom ettirilganiga qaramay, jarayonga jalb etilgan yordamchi organlar hamda tez tibbiy yordam xizmati xodimlari sababsiz ravishda kelmagan. Shuningdek, javobgar tomonining qarshilik ko‘rsatish holatlari davom etgani sababli, majburiy ijro harakatlari yana bir bor muddatga cho‘zilib, 2021 yil 14 iyun kuni soat 15:00 ga qoldirildi.

Mutasaddilarning ta’kidlashicha, olib borilgan ijro harakatlari davomida hech qanday qonunbuzilish holatlari aniqlanmagan. Agar ijro harakatlarini to‘xtatish yoki kechiktirish yuzasidan sud yoxud boshqa vakolatli organ hujjatlari taqdim etilmasa, ijro harakatlari qonuniy ravishda davom ettirilishi mumkin. Fuqarolarga bu kabi holatlarda bevosita qaror qabul qilgan organlarga murojaat etish tavsiya etiladi.