Apple kompaniyasi o'zlashtirgan mashhur ilovalar 📱

Apple kompaniyasining iOS 18, macOS Sequoia va boshqa yangi operatsion tizimlarining taqdimoti texnologiya olamida katta qiziqish uyg'otdi. Biroq, taqdim etilgan yangi funksiyalarning ayrimlari mustaqil dasturchilar ishlab chiqqan mashhur ilovalarning imkoniyatlarini takrorlaydi. Texnologiya olamida mazkur holat ko'p yillardan beri "Sherlocking" deb ataladi. Bu atama 2002 yilda Apple kompaniyasining o'z Mac-qidiruv tizimiga boshqa dasturning xususiyatlarini qo'shganidan kelib chiqqan bo'lib, joriy yilda ham bir nechta mashhur ilovalar shu ta'sirga tushdi.

Jumladan, kompaniya maxsus Parollar ilovasini taqdim etdi. U foydalanuvchining shifrlari, maxsus kalitlari va tarmoq kodlarini jamlab, bir nechta qurilmalar, jumladan Windows uchun ham xizmat qiladi. Bu holat 1Password kabi mustaqil parol menejerlari uchun raqobatni kuchaytiradi. Shuningdek, macOS Sequoia tizimida oynalarni ekranning burchaklariga tortish orqali tartibga solish imkoniyati paydo bo'ldi. Bungacha Mac foydalanuvchilari buning uchun Magnet kabi maxsus dasturlardan foydalanishga majbur edi.

Kalkulyator ilovasi ham sezilarli darajada yangilanib, o'zgaruvchilar bilan ishlash va grafikalar tuzish imkoniyatini berdi. Hisob-kitoblarni qo'lda yozib bajarish funksiyasi MyScript Calculator dasturini eslatib yuborsa, boshqa imkoniyatlari Soulver 3 ilovasiga o'xshab ketadi. Shuningdek, macOS 15 tizimining eng e'tiborga molik yangiliklaridan biri "iPhone Mirroring" deb nomlandi. Bu funksiya orqali foydalanuvchilar Mac orqali o'z smartfoniga kirib, bildirishnomalarni qabul qilishi va fayllarni ko'chirishi mumkin. Ushbu imkoniyat Bezel kabi muqobil ilovalar faoliyatiga ta'sir ko'rsatadi.

Bundan tashqari, iOS 18 tizimida qo'ng'iroqlarni yozib olish va ularni matnga o'tkazish imkoniyati yaratildi, bu esa TapeACall kabi dasturlarga ehtiyojni kamaytiradi. Emojisozlik yo'nalishida esa Newji ilovasiga javoban "Genmojis" funksiyasi taqdim etildi. AQSh milliy bog'lari bo'ylab sayohat qiluvchilar uchun ham yangi xarita yo'nalishlari va takliflar ishlab chiqildi.