Dogwifhat mem-koyni Las-Vegasdagi Sphere ekraniga chiqmoqda 🐕

Solana tarmog‘ida ommalashib borayotgan Dogwifhat mem-koyni jamoasi o‘zining bosh kiyimli iti tasvirini dunyodagi eng yirik LED ekran – Las-Vegasdagi Sphere arenasida namoyish etish uchun qariyb 700 000 dollar mablag‘ to‘pladi. Dam olish kunlari ish boshlagan “Sphere Wif Hat” deb nomlangan ushbu tashabbus arena uchun bir haftalik reklama maydonini sotib olishga yetarli deb hisoblangan 650 000 dollarlik maqsadli ko‘rsatkichga erishdi. Tashkilotchilar belgilangan summadan oshib ketishiga qaramay xayriyalarni qabul qilishda davom etishdi va natijada USDC stablekoinida 690 000 dollardan ortiq mablag‘ yig‘ildi.

Kampaniyaning muvaffaqiyat qozonishida Solana ekotizimidagi yirik ishtirokchilarning ko‘maklari muhim rol o‘ynadi. Jumladan, chorshanba kuni Phantom hamyoni ushbu xayriya aksiyasini o‘z bosh sahifasida e'lon qilgach, bir necha daqiqa ichida hamyon schyotiga yuz minglab dollar mablag‘ kelib tushdi. Mablag‘larning katta qismi oddiy foydalanuvchilar tomonidan 1 dollardan 10 dollargacha bo‘lgan kichik miqdorlardagi USDC yordamida amalga oshirildi.

Ushbu moliyaviy muvaffaqiyat ortidan Dogwifhat (WIF) tokeni bir necha daqiqa ichida 18 foizga qimmatlashdi. Oxirgi 24 soat ichida esa uning narxi 36 foizdan ziyodroq o‘sishni ko‘rsatib, 2.66 dollarga yetdi va yaqindagina 2.68 dollarlik yangi tarixiy rekordini o‘rnatdi. Mazkur o‘sish natijasida WIF bozordagi kapitallashuv bo‘yicha BONK va FLOKI kabi boshqa raqobatdosh it mavzusidagi tokenlarni ortda qoldirdi. Hozirda 2.56 milliard dollarlik bozor qiymatiga ega Dogwifhat dunyodagi to‘rtinchi yirik mem-koynga aylandi.

Shunga qaramay, yig‘ilgan mablag‘lar va rejalashtirilgan reklama bo‘yicha ayrim savollar mavjud. Hozircha besh nafar tashkilotchi Sphere marketing guruhi bilan aloqa o‘rnatilgani yoki mablag‘lar to‘langani haqida hech qanday rasmiy dalil taqdim etmadi. Guruh a'zolaridan biri Sphere bilan aloqada bo‘lganini va ortiqcha mablag‘lar marketing byudjetida saqlanishini ma'lum qilgan bo‘lsa, nashrning bu boradagi savollariga Sphere tomonidan hozircha javob berilmadi.