"Euphoria" yulduzi Angus Cloud vafot etdi 😢

So'nggi yillarning eng ommabop teleloyihalaridan biri bo'lgan "Euphoria" serialida "Fezco" qahramonini gavdalantirgan yosh aktyor Angus Cloud 25 yoshida vafot etdi. Butun dunyoga ushbu serial orqali tanilgan iste'dodli aktyorning hayotdan ko'z yumgani uning oilasi tomonidan rasman e'lon qilindi. Hozircha san'atkorning aniq o'lim sabablari ma'lum qilinmagan.

Ma'lum bo'lishicha, Cloud yaqinda o'z otasini yo'qotgan va oilasining bergan ma'lumotiga ko'ra, u oxirgi paytlarda jiddiy ruhiy muammolar va tushkunlik bilan kurashayotgan edi. Aktyor o'z uyida jonsiz holda topilgan. Uning o'limi ortidan turli xabarlar tarqaldi, xususan TMZ nashri oilaga yaqin manbalarga tayanib, aktyor otasining o'limidan so'ng o'z joniga qasd qilish haqidagi o'ylar bilan qiynalganini iddao qildi.

Voqea joyiga Oakland shahri politsiya va o't o'chirish departamenti xodimlari jalb etildi. Mahalliy vaqt bilan soat 11:30 da Angusning onasi favqulodda xizmatlarga qo'ng'iroq qilib, o'g'li giyohvand moddalarni haddan tashqari ko'p dozada qabul qilgan bo'lishi mumkinligi va uning nabzi urmayotganini ma'lum qilgan. Vakillar hozircha o'lim sababi to'liq aniqlanmagani va tergov harakatlari boshlanganini bildirishdi.

Angus Cloudning bevaqt vafotidan so'ng, "Euphoria" serialini efirga uzatuvchi HBO kompaniyasi ham maxsus bayonot tarqatdi. Kompaniya vakillari aktyorning vafotidan chuqur qayg'uda ekanliklarini ta'kidlab, u o'z ishining ustasi bo'lganini hamda HBO va serial jamoasining qadrli a'zosi sifatida doimo yodda qolishini ta'kidlashdi.