Amazon: Barcha jamoalar sun'iy intellekt ustida ishlamoqda 🤖

Hozirgi kunda texnologiya olamining asosiy e'tibori sun'iy intellekt yo'nalishiga qaratilgan bo'lib, Google va Meta kabi yirik korporatsiyalar bu borada qator qadamlar tashlamoqda. Ushbu jarayondan chetda qolmagan Amazon kompaniyasi ham o'z resurslarini ushbu sohaga yo'naltirmoqda.

Amazon bosh direktori Endi Jassiy kompaniyaning yilning ikkinchi choragi bo'yicha moliyaviy hisobot yig'ilishida muhim bayonotlar berdi. Jassiyning so'zlariga ko'ra, korporatsiyaning barcha jamoalari va bo'linmalari ayni paytda generativ sun'iy intellekt texnologiyalari ustida qizg'in ishlamoqda.

Kompaniya o'zining AWS xizmatlari orqali sun'iy intellekt ilovalari uchun zarur bo'lgan infratuzilma va xizmatlarni taqdim etib kelmoqda. Shu bilan birga, Amazon o'zining ichki loyihalariga ham ustuvor ahamiyat bermoqda.

So'nggi oylarda Amazon tomonidan bir qator sun'iy intellekt tashabbuslari amalga oshirildi. Xususan, qidiruv tizimiga suhbat botini qo'shish, tezroq yetkazib berishni ta'minlaydigan tizimlarni yaratish va aprel oyida mijozlarga o'z modellarini yaratish imkonini beruvchi Bedrock platformasini taqdim etish shular jumlasidandir.

Boshqa tomondan, Apple rahbari Tim Kuk ham kompaniyaning sun'iy intellekt yo'nalishida ish olib borayotganini tasdiqlagan edi. Hozirda Apple GPT deb nomlanayotgan bot yordamida mazkur poygaga qo'shilishi haqidagi taxminlar tobora kuchaymoqda.