💻 IT-mutaxassislar uchun imtiyozli ipoteka 3% gacha pasaytiriladi

Raqamli rivojlanish vazirligi soha vakillarining murojaatlariga asosan IT-mutaxassislar uchun moʻljallangan imtiyozli ipoteka shartlarini sezilarli darajada yumshatishni rejalashtirmoqda. Ushbu tashabbus doirasida kredit stavkasini 5 foizdan 3 foizga tushirish taklif etilmoqda. Hozirda vazirlik tomonidan tegishli qaror loyihasi tayyorlab qoʻyilgan boʻlib, uning qachon rasman kuchga kirishi haqida hozircha aniq maʼlumot berilmagan.

Yangi oʻzgarishlarga koʻra, imtiyozli ipoteka olishi mumkin boʻlgan mutaxassislarning yosh chegarasi ham oʻzgaradi. Agar avval bu imkoniyat 22 yoshdan 44 yoshgacha boʻlgan fuqarolarga berilgan boʻlsa, endilikda yosh oraligʻi 22 yoshdan 50 yoshgacha etib belgilanmoqda. Shuningdek, daromadlar boʻyicha qoʻyiladigan talablar ham pasaytiriladi. Million aholili shaharlarda minimal oylik maosh talabi 150 ming rubldan 120 ming rublga tushirilsa, boshqa hududlarda bu koʻrsatkich 100 ming rubldan 70 ming rublgacha kamaytiriladi. Shu bilan birga, poytaxt Moskva shahri uchun oylik maosh boʻyicha belgilangan 150 ming rubllik talab oʻzgarishsiz qoladi.

Maʼlumot uchun, IT-mutaxassislar uchun maxsus imtiyozli ipoteka joriy yilning may oyida ishga tushirilgan edi. Iyul oyining oʻrtalariga kelib banklarga jami 12 mingta ariza kelib tushgan. Shundan 8 mingta ariza maʼqullanib, umumiy qiymati 14,4 milliard rublni tashkil etuvchi 1,6 mingta kredit berilgan.

Bundan tashqari, vazirlik ilgari asosiy faoliyati IT sohasi boʻlmagan 400 dan ortiq tashkilotlarni, jumladan, bir qator yirik banklar, Markaziy bank, Moskva birjasi va boshqa tuzilmalarni akkreditatsiya qilingan kompaniyalar reyestridan chiqargan edi. Shunga qaramay, mutaxassislar ish beruvchisining reyestrdan chiqarilishi ushbu kompaniyalarda mehnat qilayotgan xodimlarning imtiyozli ipoteka stavkalarini qayta koʻrib chiqish uchun asos boʻlmasligi kafolatlangan.